26 ՅՈՒՆՈՒԱՐ 2016
Երէկ Սթրազպուրկի մէջ սկսաւ Եւրոպական խորհուրդի Խորհրդարանական վեհաժողովի (ԵԽԽՎ) ձմեռնային նստաշրջանը, եւ օրակարգի հաստատման ժամանակ երկու նախագիծերը դուրս չմնացին շրջանառութենէ` թէեւ եղած էին նման առաջարկներ:
Մինչեւ նստաշրջանը սկսի, Խորհրդարանական վեհաժողովի նախկին նախագահ Անն Պրասյորն իր մամլոյ ասուլիսին ընթացքին անդրադարձած էր բանաձեւերու նիւթերուն: Անոր համաձայն, բազմաթիւ առաջարկներ եղած են` այդ բանաձեւերու նախագիծերուն քննարկումները չկատարելու վերաբերեալ: «Հայաստանն ու Ազրպէյճանը Եւրոպական խորհուրդի անդամ երկիրներ են, եւ մենք պէտք է լուծում գտնենք, որպէսզի մարդիկ խաղաղութեան մէջ ապրին: Այդ պատճառով պէտք է քրտնաջան աշխատինք, որովհետեւ մարդիկ կը տառապին այդ շրջանին մէջ: Անոնք Եւրոպական խորհուրդի քաղաքացիներն են, անոնց իրաւունքները պէտք է պաշտպանուին, կը մնայ միայն գտնել միջոցը: Տագնապին լուծում մը պէտք է գտնուի: Իմ անձնական կարծիքն է, որ մենք պէտք չէ կացութիւնը ձգենք այնպէս, ինչպէս որ է», ըսած է Անն Պրասէօրը:
Երէկ ԵԽԽՎ-ի վեհաժողովի նախագահի պաշտօնին ընտրուած է Փետրօ Ակրամունթ, որուն թեկնածութիւնը առաջարկուած է Եւրոպական ժողովրդական կուսակցութեան կուսակցական բաժինէն: Ակրամունթ Սպանիոյ ծերակոյտի անդամ է` Վալենսիայէն:
Քաղաքական գործիչը ծանօթ է Ուքրանիոյ օգտին իր յայտարարութիւններով, ան նաեւ Խրիմի կցումի խիստ քննադատ է: Շատեր անոր ընտրութիւնը վիճելի կը նկատեն, որովհետեւ անոր անունը շրջանառութեան մէջ դրուած է Ազրպէյճանի կողմէ ԵԽԽՎ-ի անդամները կաշառելու վերաբերեալ լրագրական հետաքննութիւններուն մէջ:
Միւս կողմէ, վեհաժողովի պաշտօնական կայքը կը տեղեկացնէ, որ տեղի ունեցած է նաեւ ԵԽԽՎ-ի փոխնախագահներու ընտրութիւնը: 20 փոխնախագահներէն մէկը ընտրուած է Հայաստանի Հանրապետութեան Ազգային ժողովի փոխնախագահ Հերմինէ Նաղդալեան:
ԱԶԴԱԿ
http://www.aztagdaily.com
