Ինչու է կանգ առել ռուսական շարասյունը․ գեներալները «գցե՞լ են» Պուտինին
03.03.2022 | Մեկնաբանություն – Lragir.am,
Արեւմտյան զլմ-ները, որոնք հենվում են հետախուզությունների տեղեկությունների վրա (մինչ այժմ դրանք ճշգրիտ տեղեկություններ են եղել), հայտնում են, որ Պուտինը վերջին օրերին ցասման մեջ է․ Կիեւը պետք է վաղուց գրավված լիներ, իսկ մարտի 2-ին նա պետք է հանդես գար Ուկրաինայի դեմ հաղթանակի ճառով։ Սակայն բլից-կրիգը չի ստացվել, նախնական պլանները խափանվել են, ավելին, ռուսական զորքը մարդուժի եւ տեխնիկայի խոշոր կուրուստներ ունի, իսկ ուկրաինացի ժողովուրդը, որը պետք է ծաղիկներով դիմավորեր պուտինյան «ազատարարներին», իսկական դիմադրություն է սկսել բանակի եւ անվտանգության ուժերի կողքին։
Ժողովուրդը դուրս է գալիս ռուսական ռազմական շարասյուների դեմ։ Իր հերթին, մեկ այլ՝ 60 կմ ձգվող ռուսական շարասյուն՝ Կիեւի մատույցներում, մի քանի օր կանգնած է մնացել․ պարզվել է, որ տեխնիկայի մի մասը փչացել է, մի մասի վառելիքն է սպառվել, սպառվել է նաեւ զինվորների սնունդը, որոնք ստիպված են թալանով զբաղվել մոտակա բնակավայրերում։ Ի դեպ, ռուսական բանակի տեխնիկայի, գերեվարված ռուս զինվորականների վիճակի վերաբերյալ հազարավոր տեսանյութերից բավական ծանր պատկեր է բացվում, եւ այդ բանակի վիճակը տեսնում են բոլորը։
Ըստ զլմ-ների, Պուտինը հավատացած է եղել, որ ուկրաինացի ժողովուրդը աջակցում է Ուկրաինան «նացիստներից ազատելու» գործին, իսկ ուկրաինական բանակը ընդունակ չէ դիմադրության։ Ինչ վերաբերում է Զելենսկիին, ապա այդ «ծաղրածուն ու նրա թմրամոլ շրջապատը», ինչպես նրանց մասին արտահայտվում են ռուս պրոպագանդոնները, վախից պետք է կամ կապիտուլյացվեր, կամ փախչեր Կիեւից։ Սակայն դա տեղի չունեցավ, եւ Զելենսկին թերեւս բոլորի համար անակնկալ մինչ այժմ ցուցաբերում է իսկական առաջնորդի հատկանիշներ, նրան արդեն համեմատում են Չերչիլի հետ, ով պնդում էր Հիտլերին դիմադրություն ցույց տալու անհրաժեշտությունը։
Այս ամենը Պուտինի ցասման պատճառն են։ Ներկայում, ըստ հետախուզությունների տվյալների, Պուտինը ծրագրում է Կիեւի առումն ու այնտեղ խամաճիկ կառավարություն հաստատելն ավարտել մարտի 6-ին։ Խոսվում է ՌԴ-ում մոբիլիզացիայի, Ուկրաինայում ռուսական կոնտինգենտի թվաքանակի մեծացման մասին, ինչը վկայում է լայնածավալ գրոհի նախապատրաստման մասին։ Պուտինը շտապում է, քանի որ ռազմական ռեսուրսներն անսպառ չեն, ճակատում արդյունքներ չկան, իսկ պատժամիջոցներն օրեցօր զգացնել են տալիս։
Միեւնույն ժամանակ, փորձագետները հարց են տալիս, թե ինչ է անելու Մոսկվան Ուկրաինայում հաջողության հասնելու դեպքում։ Այս հարցին պատասխան չկա նաեւ Մոսկվայում, «ապառազմականացման եւ դենացիֆիկացիայի» մանթրաներից բացի։ Բոլոր պարագաներում, Պուտինն իր արշավի արդյունքում ստանալու է ռուսատյաց երկիր, երկարատեւ ու կործանիչ պատժամիջոցներ եւ առավել քան երբեւէ համախմբված Արեւմուտք։ Սա հետեւանքների մի մասն է։
www.lragir.am/2022/03/03/702168/
