Բաքվից սիրիացի գրոհայինները մեկնում են ՌԴ տրամադրության տակ՝ Ուկրաինայի դեմ կռվելու

Բաքվից սիրիացի գրոհայինները մեկնում են ՌԴ տրամադրության տակ՝ Ուկրաինայի դեմ կռվելու

08.03.2022 | Մեկնաբանություն | Lragir.am,

Արեւմտյան մամուլում հետախուզությունների տեղեկություններ են հրապարակվում այն մասին, որ Կրեմլը օտարերկրյա գրոհայիններ է հավաքագրում, մասնավորապես Սիրիայից, Ուկրաինայի դեմ կռվելու համար։ Պենտագոնի խոսնակը հաստատել է այդ տեղեկությունները։

Տեղեկություններ կան, որ արաբ եւ սիրիական չերկես (չեչեն) վարձկանները, որոնք դեռ Կասպից արեւմուտքում են (այսպես կոչված «ադրբեջանում»), Բաքվի օդակայանից Ուկրաինային սահմանակից ռուսական Բելգորոդ են տեղափոխվում ուկրաինական ուժերին Դոնբասից արեւմուտք շրջափակման մեջ վերցնելու համար։

Սրանք այն գրոհայիններն են, որոնք Մոսկվա-Անկարա համաձայնությամբ Սիրիայից տեղափոխվել էին Հայաստանի դեմ Արցախում կռվելու համար։ Լրագիրը բազմիցս անդրադարձել է այս թեմային (տես նաեւ այստեղ)։ Այն ժամանակ ՌԴ ԱԳ նախարար Լավրովը Իրանի եւ այլ երկրների՝ այս կապակցությամբ հարցադրումներին պատասխանեց, որ գրոհայինները չեն սպառնում ոչ Ռուսաստանի, ոչ էլ այլ երկրների անվտանգությանը, ինչը վկայում էր ՌԴ-ի առաջնորդությունը գրոհայիններին տեղափոխելու հարցում։ Նրանց զգալի մասը նոյեմբերի 9-ի հրադադարից հետո մնաց Կասպից արեւմուտքում, շարունակվեց գրոհայինների նոր խմբերի տեղափոխումը Սիրիայից Կասպից արեւմուտք։

Ուկրաինական ճակատում Մոսկվա-Բաքու-Անկարա համակարգումն ակնհայտ է։ Անկարան նեղուցների հարցում իր պարտականությունների կատարման մասին հայտարարեց այն բանից հետո, երբ ռուսական նավատորմն արդեն բազավորվել էր սեւծովյան նավահանգիստներում։ Թուրքիան ուկրաինական հարցում ՌԴ-ին առաջարկում է եռակողմ ձեւաչափ։ Գործողությունների համակարգման դրսեւորում էր նաեւ Մոսկվա-Բաքու ռազմավարական փոխգործակցության եւ փոխօգնության հռչակագիրը։

Մոսկվան ներգրավում է բոլոր հնարավոր «ռեզերվները»․ կայսրության վերջին մարտն է՝ լինել-չլինելու խնդիր։ Այսպիսին է նախագահ Պուտինի պատկերացումը տեղի ունեցող հանգուցալուծման մասին։

lragir.am/2022/03/08/703214/