Փեսքով. «Որեւէ Պահու Կրնանք Դադրեցնել Յատուկ Զինուորական Գործողութիւնը, Եթէ Քիեւ Ընդունի Մեր Պայմանները»
08 ՄԱՐՏ 2022 – ԱՇԽԱՐՀ – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
Երէկ ուշ գիշերին Ռուսիոյ Դաշնութեան եւ Ուքրանիոյ պատուիրակութիւնները Պիելոռուսիոյ Պելովեծսքայա շրջանին մէջ սկսան բանակցութիւններու երրորդ փուլին: ԹԱՍՍ լրատու գործակալութիւնը կը հաղորդէ, թէ այս մասին տեղեկացուցած է Պիելոռուսիոյ մէջ Ռուսիոյ դեսպանատունը:
Ռուսիոյ նախագահի բանբեր Տմիթրի Փեսքով երէկ յայտնեց, որ Ռուսիան Ուքրանիոյ յայտնած է, որ որեւէ պահու կրնայ դադրեցնել յատուկ զինուորական գործողութիւնը, եթէ Քիեւ ընդունի Մոսկուայի պայմանները:
Անոր համաձայն, Ուքրանիան պէտք է ընդունի Խրիմի ռուսական տարածք ըլլալը, ինչպէս նաեւ ճանչնայ Տոնպասի ժողովրդային հանրապետութեան եւ Լուկանսքի ժողովրդային հանրապետութեան անկախութիւնը:
Բացի ատկէ, Փեսքովի համաձայն, Ուքրանիան պէտք է սահմանադրականօրէն ամրապնդէ իր ոչ յանձնառու կարգավիճակը:
«Մենք իրականութեան մէջ կ՛աւարտենք Ուքրանիոյ ապառազմականացումը… Անոնք (ուքրանացիները) պէտք է դադրեցնեն մարտական գործողութիւնները», ըսած է Ռուսիոյ նախագահի բանբերը:
Չինաստանի արտաքին գործոց նախարար Ուանկ Եի յայտնեց. «Պիտի շարունակենք զօրակցիլ Ռուսիոյ եւ Ուքրանիոյ բանակցութիւններուն, եւ բանակցութիւնները շարունակելը հանդարտութիւն ու ողջախոհութիւն կը պահանջէ, ուստի պէտք է շրջանին մէջ երկարատեւ կայունութեան վրայ կեդրոնանանք»:
«Յանձնառու ենք Ռուսիոյ հետ գործընկերութեան ու բարեկամութեան, եւ մեր յարաբերութիւնները հիմնուած են անկողմնակալութեան ու ճակատումի մերժումին վրայ, եւ մենք կը մերժենք Պաղ պատերազմին կամ դիմակայութեան վերադառնալ», ըսաւ ան` նշելով. «Չին-ռուսական յարաբերութիւնները հիմնուած են յարգանքի վրայ, եւ նախանձախնդիր ենք, որ երրորդ կողմ մը անոնց չմիջամտէ»:
«Չինական կարմիր խաչը պիտի նպաստէ Ուքրանիոյ մարդասիրական աջակցութեան տրամադրման» շեշտեց ան` աւելցնելով. «Պէյճինկ պատրաստ է ուքրանական տագնապի լուծման առումով պէտք եղած միջնորդութիւնը կատարելու»:
www.aztagdaily.com/archives/540124
