«Ուքրանիան Պիտի Յաղթէ, Եւ Փութին Պիտի Ստիպուի Ռուսիոյ Վրայ Պատերազմի Հետեւանքներուն Ու Բանակցութիւններուն Միջեւ Ընտրութիւն Կատարել» Կ՛ըսէ Լը Տրիան
08 ՄԱՐՏ 2022 – ԱՇԽԱՐՀ – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
Ֆրանսայի արտաքին գործոց նախարար Ժան Իվ Լը Տրիան յայտնեց. «Տասը օրուան ընթացքին ամէնէն ուշագրաւը ուքրանական դիմադրութեան մեծ կարողականութիւնն է, այնպիսի աստիճանի մը, որ փորձագէտները չերեւակայեցին»:
«Մենք մուտք կը գործենք պաշարման տրամաբանութեան մէջ, եւ պաշարման տրամաբանութիւնը գիտենք ռուսական ուժերու աշխատելաոճին ու աշխատանքին աղէտալի նախկին փորձառութիւններէն», ըսաւ ան:
«Չեչենիոյ մէջ Կրոզնիի օրինակը ունինք, իսկ Սուրիոյ մէջ Հալէպի օրինակը, եւ ահաւասիկ ատիկա կը կրկնուի», յայտնեց Լը Տրիան` աւելցնելով. «Պատերազմի աւարտէն ետք ուքրանական Մարիուփոլ քաղաքին մէջ մեր յայտնաբերելիքը պիտի ըլլայ ահաւոր, եւ կայ Օտեսան, ապա` Քիեւը»:
«Կը կարծեմ, որ Ուքրանիան պիտի յաղթէ», ըսաւ ֆրանսական դիւանագիտութեան պետը` շեշտելով Ռուսիոյ դիւանագիտական մեկուսացման ու միջազգային պատժամիջոցներու ազդեցութիւնը:
«Մենք ընդլայնուած պատժամիջոցներու շարք մը որդեգրեցինք: Ատոր ազդեցութիւնը սկսաւ ի յայտ գալ, եւ իմ կարծիքովս` հետզհետէ աւելի ծանր պիտի ըլլայ, ինչ որ կը նշանակէ, թէ պատերազմին դիմաց վճարուելիք գինը պիտի դառնայ անտանելի, եւ որոշ փուլի Ռուսիոյ նախագահ Վլատիմիր Փութին պիտի ստիպուի ընտրել անոնց Ռուսիոյ վրայ ունեցած մեծ ազդեցութեան ու բանակցութիւններու ձեռնարկման միջեւ», յայտնեց Ֆրանսայի արտաքին գործոց նախարարը:
Ֆրանսայի նախագահ Էմանուէլ Մաքրոն դատապարտեց Փութինի` «քաղաքականութեան ու բարոյականութեան» սկզբունքներու անտեսումը, երբ առաջարկեց քաղաքայինները ուքրանական քաղաքներէն «Ռուսիա փոխադրելու» մարդասիրական միջանցքներ:
Մաքրոն ֆրանսական «Էլ.Սէ.Ի.» պատկերասփիւռի կայանին յայտնեց. «Կարեւորը պարզապէս այդ միջանցքները չեն կամ այն կեղծաւոր խօսքը, թէ «մարդիկը պիտի պաշտպանենք զանոնք Ռուսիա փոխադրելու համար»:
«Այս բոլորը լաւ չէ, ասիկա ինծի համար անտանելի բարոյական ու քաղաքական անտեսում է», ըսաւ Ֆրանսայի նախագահը:
aztagdaily.com/archives/540122
