Իրան Հրթիռակոծեց Էրպիլի Մէջ «Սիոնական Սադրանքներու Ռազմավարական Կեդրոն Մը»
14 ՄԱՐՏ 2022 – ՀԱՅԱՍՏԱՆ – ԱՇԽԱՐՀ – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
Իրաքի Քրտական ինքնավար շրջանին մէջ ահաբեկչութեան դէմ պայքարի մարմինը յայտարարեց, որ կիրակի արշալոյսին «12 թեւաւոր հրթիռներ» թիրախ դարձուցած են շրջանի մայրաքաղաքն ու այնտեղ գտնուող ամերիկեան հիւպատոսարանը` աւելցնելով, որ հրթիռները արձակուած են «Քրտական շրջանի եւ Իրաքի սահմաններուն դուրսէն, աւելի ճիշդ` արեւելեան կողմէն:
Ամերիկացի պաշտօնատարներ «Ռոյթըրզ» լրատու գործակալութիւնը յայտնեցին, որ ամերիկացի զինուորներ զոհուած են` նշելով. «Էրպիլը հարուածած հրթիռներ արձակուեցան Իրանէն»: Լրատու գործակալութիւնը նաեւ, յղում կատարելով իրանեան պետական պատկերասփիւռի կայանին, յայտնեց. «Հիւսիսային Իրաքի Քրտական Ինքնավար շրջանի մայրաքաղաք Էրպիլի վրայ գործուած հրթիռային յարձակումին թիրախը իսրայէլեան գաղտնի ռազմակայաններ էին»:
Իրանի Յեղափոխական պահակագունդը աւելի ուշ ստանձնեց հրթիռակոծման պատասխանատուութիւնը` յայտնելով, որ արձակուած «ուժեղ ու ճշգրիտ» հրթիռները թիրախ դարձուցած են հիւսիսային Իրաքի մէջ «սիոնական սադրանքներու ռազմավարական կեդրոն մը»:
Պահակագունդը հաղորդագրութիւն մը հրապարակելով նշեց. «Հրթիռակոծումը կատարուեցաւ իբրեւ պատասխան սիոնական կեղծ գոյացութեան գործած վերջին ոճիրներուն»: Հաղորդագրութեան մէջ ընդգծուեցաւ, որ Իրանի անվտանգութիւնն ու կայունութիւնը «կարմիր գիծեր» են:
«Սիոնական ոճրագործ վարչակարգին անգամ մը եւս կը զգուշացնենք, որ որեւէ չարիքի կրկնութիւնը կարծր, վճռական ու քանդիչ հակազդեցութեան պիտի արժանանայ», շեշտեց Յեղափոխական պահակագունդը:
Իրանի Յեղափոխական պահակագունդը քանի մը օր առաջ յայտարարած էր, որ Դամասկոսի մօտ իսրայէլեան յարձակումի մը պատճառով իրանցի երկու զինուորներ մահացած են` աւելցնելով, որ Իսրայէլ «այս ոճիրին գինը» պիտի վճարէ:
«Մայատին» արբանեակային պատկերասփիւռի կայանի աղբիւրները յայտնեցին, որ աւելի քան 10 հրթիռներով կատարուած յարձակումը յաջողած է հարուածել Էրպիլի մօտ իսրայէլեան հետախուզական կեդրոն մը: Աղբիւրները աւելցուցին, որ յարձակումին հետեւանքով քանդուած է Մատիֆ Սալահէտտին ճամբուն վրայ գտնուող Մոսատի կեդրոնը` աւելցնելով, որ յարձակումը «իրաքեան կամ ամերիկեան որեւէ կեդրոն չթիրախաւորեց»: Հրթիռակոծման պատճառով իսրայէլեան գաղտնի սպասարկութեան գործակալներ մահացած ու վիրաւորուած են:
Իրաքի արտաքին գործոց նախարարութիւնը դատապարտեց «Էրպիլի նահանգին մէջ քաղաքայիններու բնակարանները հարուածած հրթիռակոծումը»` աւելցնելով. «Այս յարձակումը Իրաքի գերիշխանութեան ոտնահարում է, խաղաղ բնակիչներու ահաբեկում եւ շատ կարեւոր փուլի մը մէջ շրջանի ու ամբողջ Իրաքի անվտանգութեան եւ կայունութեան քայքայում կը պատճառէ»:
«Այս յարձակումը Իրաքի անվտանգութեան ու ժողովուրդի կայունութեան թիրախաւորում մը կը նկատուի եւ ատոր դիմակայման համար միացեալ կեցուածք կը պահանջէ` վճռակամ կերպով կանգնելով որեւէ արարքի դէմ, որուն նպատակը քաոսի ստեղծումն է»:
Հիւսիսային Իրաքի Քրտական ինքնավար մարզի նախարարաց խորհուրդը յայտարարեց. «Իրանի Յեղափոխական պահակագունդին Էրպիլի մէջ հարուածած դիրքը քաղաքային է եւ ոչ թէ իսրայէլեան ռազմակայան մը»: Խորհուրդը աւելցուց. «Հարուածը արդարացնելու քայլին նպատակը տգեղ ոճիրը ծածկելն է միայն»:
Իրաքի մէջ Սատերական հոսանքի ղեկավար Մուքթատա Սատըր պահանջեց ՄԱԿ-ին եւ Իրաքի մէջ Իրանի դեսպանին անմիջապէս բողոքագիր ներկայացնել` երաշխաւորելով, որ յարձակումները չկրկնուին: «Պէտք է կարելի եղածին չափ շուտ հետաքննութիւն կատարել իսրայէլեան դիրքերու գոյութեան պնդումներուն շուրջ», աւելցուց ան:
Պէտք չէ իրաքեան հողերը իբրեւ քաղաքական ու զինուորական տագնապներու բեմ օգտագործել», ըսաւ ան` նշելով. «Մենք կը դատապարտենք Իրաքի հողերէն դրացի երկիրներու թիրախաւորման բոլոր արարքները»:
aztagdaily.com/archives/540764
