Սերկէյ Լաւրով
27 ՅՈՒՆՈՒԱՐ 2016
«Արմէնփրես» կը հաղորդէ, որ Ռուսիոյ արտաքին գործոց նախարար Սերկէյ Լաւրով Մոսկուայի մէջ տեղի ունեցած տարեկան ամփոփիչ ասուլիսին ժամանակ յայտարարած է, որ Լեռնային Ղարաբաղի տագնապի լուծման առնչութեամբ որեւէ փաստաթուղթ գոյութիւն չունի, եղած են համանախագահներու նախաձեռնութեամբ քանի մը առաջարկներ, որոնք, սակայն, չեն առաջնորդած տագնապին լուծման եւ ներկայ դրութեամբ կը գտնուին ԵԱՀԿ-ի Ընդհանուր քարտուղարին մօտ:
Լրագրողի մը խնդրանքով մեկնաբանելով լրատուամիջոցներու մէջ շրջանառուող այն տեղեկութիւնը, թէ Լեռնային Ղարաբաղի տագնապի լուծման առնչութեամբ գոյութիւն ունի փաստաթուղթ մը, որ կը կոչուի «Լաւրովի առաջարկներ», ռուսական դիւանագիտութեան պետը բացատրած է, որ Լաւրովի կամ որեւէ մէկ այլ անձի փաստաթուղթ գոյութիւն չունի:
«Կան շարք մը փաստաթուղթեր, 4-5, թերեւս վեց, հիմա չեմ յիշեր, որոնք Լեռնային Ղարաբաղի տագնապի լուծման ուղղութեամբ տարուող բանակցութիւններու տարբեր հանգրուաններուն պատրաստած էին համանախագահները, երբ խօսք կ՛ըլլար, թէ պէտք է իբրեւ առաջին քայլ բանակցութիւններու վերաբերեալ հիմնական սկզբունքներու փաստաթուղթ պատրաստուի, իսկ յետոյ արդէն այդ սկզբունքներուն հիման վրայ` խաղաղութեան համաձայնագիրը, որ պիտի ունենար իրաւական տեսանկիւնէ պարտաւորիչ եւ ոչ թէ քաղաքական բնոյթ:
«Այդ փաստաթուղթի տարբեր տեսակները, իսկ անոնք 2007-2011 թուականներուն եղափոխութիւն ապրած են, համանախագահները յանձնած են ԵԱՀԿ-ի ընդհանուր քարտուղարին, եւ անոնք կը գտնուին այդ կազմակերպութեան դարակը: Անոնք միակ թուղթերն են, զորս կարելի է անուանել փաստաթուղթեր:
Պաշտօնապէս գոյութիւն ունեցող այդ փաստաթուղթերէն որեւէ մէկը չէ առաջնորդած գործնական լուծման Լեռնային Ղարաբաղի տագնապի լուծման առնչութեամբ, աշխատանքները կը տարուին այն սկզբունքով, որ «ոչինչ չէ համաձայնուած, եթէ ամէն ինչ չէ համաձայնուած»: Ռուսական կողմը, ինչպէս դուք գիտէք, 2010 թուականէն սկսեալ, երբ կը նախագահէր Տմիթրի Մետվետեւը, ջանքեր գործադրած է, որպէսզի գտնէ լուծումը այն խնդիրներուն, որոնք տակաւին չեն հանդիսանար կողմերու համաձայնութեան առարկայ: Եւ ատիկա օգնած է որոշ տեղ յառաջ երթալու, յետոյ եղաւ բաւական երկար դադար, որմէ ետք յունիս 2011-ին Կազանի վեհաժողովին, հակառակ եղած յոյսերուն, կարելի չեղաւ համաձայնութեան գալ հիմնական սկզբունքներուն շուրջ: Իսկ ատկէ ետք, երբ նախագահ Փութին անգամ մը եւս վերընտրուեցաւ այդ պաշտօնին վրայ, ան հանդիպեցաւ Հայաստանի եւ Ազրպէյճանի նախագահներուն հետ եւ երեք նախագահներուն յանձնարարութեամբ մենք փորձեցինք ուժեղացնել ջանքերը խնդիրներու լուծման ուղղութեամբ:
«Խնդիրներու լուծման փնտռտուքները այժմ գաղափարներու, բարձրաձայն միտքերու մակարդակով են: Ես ունեցած եմ քանի մը հանդիպում Հայաստանի եւ Ազրպէյճանի իմ գործընկերներուս հետ եւ մենք այդ ամէնը քննարկած ենք նաեւ Միացեալ Նահանգներու եւ Ֆրանսայի համանախագահներուն հետ: Որեւէ այլ փաստաթուղթ, բացի անկէ, որ պահ դրուած է ԵԱՀԿ-ի մօտ, գոյութիւն չունի: Մնացեալ ամէն ինչը փնտռտուք է, ինչպէս արդէն ըսի` միտքեր», ըսած է Լաւրով:
ԱԶԴԱԿ
http://www.aztagdaily.com
