Երեւան Դիմեց ԵԱՀԿին՝ Խաղաղութեան Պայմանագիրի Կնքման Նպատակով Բանակցութիւններ Կազմակերպելու
14 ՄԱՐՏ 2022 – ՀԱՅԱՍՏԱՆ – ԱՇԽԱՐՀ – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
ԵՐԵՒԱՆ, «Ազատութիւն».- Երեւան պատասխանեց Պաքուէն փոխանցուած առաջարկներուն եւ դիմեց ԵԱՀԿի Մինսքի խումբի համանախագահութեան՝ Հայաստանի ու Ատրպէյճանի միջեւ խաղաղութեան պայմանագիրի կնքման նպատակով բանակցութիւններ կազմակերպելու համար՝ ՄԱԿի կանոնադրութեան, Քաղաքական եւ քաղաքացիական իրաւունքներու միջազգային դաշնագիրի եւ Հելսինքիի վերջնական հռչակագիրի հիման վրայ: Այս յայտարարութիւնը կատարեց Հայաստանի արտաքին գործոց նախարարութիւնը՝ առանց յստակացնելու, թէ ընդունա՞ծ են, թէ մերժած Պաքուի առաջարկները:
Մինչ հայաստանցի պաշտօնեաները կը լռեն, թէ ի՛նչ առաջարկներ ստացած եւ ի՛նչ պատասխան տուած են Պաքուին, վերջինը բացայայտեց 5 կէտերէ բաղկացած թղթածրարին բովանդակութիւնը, կամ, ինչպէս ատրպէյճանական լրատուամիջոցները կը ձեւակերպեն՝ «Երեւանի հետ խաղաղութեան պայմանագիրի շուրջ բանակցելու նախապայմանները»: Իսկ ԵԱՀԿին դիմելու Հայաստանի նախաձեռնութեան՝ Պաքուն որեւէ կերպով չէ արձագանգած:
Ըստ Ատրպէյճանի արտաքին գործոց նախարարութեան մամլոյ խօսնակ Լէյլա Ապտուլաեւայի՝ փաստաթուղթի նախագիծին մէջ կան հետեւեալ դրոյթները.
– Կողմերը փոխադարձաբար կը ճանչնան երկու երկիրներու տարածքային ամբողջականութիւնը, սահմաններու անքակտելիութիւնը եւ իրարմէ քաղաքական անկախութիւնը,
– Կողմերը կը հաստատեն, որ իրարու նկատմամբ չունին տարածքային ոտնձգութիւններ եւ կը ստանձնեն ապագային եւս նման ոտձգութիւններէ հրաժարելու իրաւական պարտաւորութիւն,
– Կողմերը պարտաւոր են միջազգային յարաբերութիւններուն մէջ զերծ մնալ մէկզմէկու անվտանգութեան, միմեանց քաղաքական անկախութեան եւ տարածքային ամբողջականութեան նկատմամբ սպառնալիքներէ,
– Կողմերը պարտաւոր են սահմանազատում եւ սահմանագծում իրականացնել եւ դիւանագիտական յարաբերութիւններ հաստատել,
– Պարտաւոր են բանալ հաղորդակցութեան երթեւեկի ուղիները եւ կապերը:
«Պաքուն պատրաստ է առարկայական, հետեւողական բանակցութիւններու՝ խաղաղութեան համաձայնագիր ստորագրելու շուրջ, եթէ Հայաստան ընդունի այս 5 հիմնարար սկզբունքները», յայտարարեց Ատրպէյճանի արտաքին գործոց նախարարութեան խօսնակը:
Երեւանի եւ Պաքուի փոխադարձ յայտարարութիւնները կը կատարուին վերջին օրերու սահմանային պարբերական լարուածութեան լոյսին տակ: 5 կէտերէ բաղկացած ծրարին մասին Ատրպէյճան խօսեցաւ անմիջապէս Երեւանի այն յայտարարութենէն ետք, թէ յառաջիկային հաւանական է, որ դիմեն ԵԱՀԿի Մինսքի խումբին՝ Ատրպէյճանի հետ խաղաղութեան բանակցութիւններու նախաձեռնելու համար:
Չբացայայտելով մանրամասնութիւնները՝ Ատրպէյճանի արտաքին գործոց նախարար Պայրամով յոյս յայտնեց, որ «Հայաստան դիւրութեամբ պիտի ընդունի ատրպէյճանական նոր փաստաթուղթը»:
Միւս կողմէ, «Ազատութեան» հետ ունեցած զրոյցի մը ընթացքին Ազգային ժողովի Արտաքին յարաբերութիւններու յանձնաժողովի նախագահ Էդուարդ Աղաջանեան յայտարարեց, որ Ատրպէյճանի տարածքային ամբողջականութեան նկատմամբ Հայաստան երբեք տարածքային նկրտումներ չէ ունեցած, խօսքը Արցախի բնակչութեան՝ իրենց ծննդավայրին մէջ անվտանգ ապրելու մասին է:
Ըստ իշխող ուժին՝ վերջին 30 տարիներուն Հայաստանի դիրքորոշումը նոյնը եղած է բանակցութիւններու սեղանին շուրջ:
Պատասխանելով «Ազատութեան» այն հարցումին, թէ այդ մէկուն կարելի՞ է հասնիլ Ատրպէյճանի կազմին մէջ՝ Աղաջանեան ըսաւ. «Կարծում եմ՝ այդ գործընթացը պէտք է քննարկուի, եւ վերջնական կարգավիճակին հասնենք Հայաստան-Ադրբեջան խաղաղութեան պայմանագրի վերջնական հաստատման եւ կնքման շրջանակներում»:
Անդրադառնալով սահմանի սահմանազատման եւ սահմանագծման մասին Պաքուի առաջարկներուն՝ Աղաջանեան նշեց, թէ Հայաստանի համար կարեւոր է, որ այդ գործընթացը չունենայ «ֆիկտիւ (կեղծ) եւ իմիտացիոն (կրկնօրինակութեան) բնոյթ», մասնաւորաբար, ստեղծել անոր համար նպաստաւոր պայմաններ:
asbarez.am/414970/երեւան-դիմեց-եահկին՝-խաղաղութեան-պայ/
