Արցախի Անվտանգութեան Խորհուրդի Նիստ. Լարուածութիւնը Շփման Գիծի Շարք Մը Հատուածներու Մէջ Կը Շարունակէ Պահպանուիլ

Արցախի Անվտանգութեան Խորհուրդի Նիստ. Լարուածութիւնը Շփման Գիծի Շարք Մը Հատուածներու Մէջ Կը Շարունակէ Պահպանուիլ

03 ՕԳՈՍՏՈՍ 2022 – ՀԱՅԱՍՏԱՆ – ԱՐՑԱԽ – ԱՇԽԱՐՀ – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:

Արցախի Հանրապետութեան նախագահ Արայիկ Յարութիւնեան 2 օգոստոսին հրաւիրած է Անվտանգութեան խորհուրդի ընդլայնուած նիստ` Ազգային ժողովի քաղաքական ուժերուն մասնակցութեամբ:

Արցախի Հանրապետութեան նախագահի աշխատակազմէն կը տեղեկացնեն, որ քննարկուած է շփման գիծին մէջ նախօրէին ստեղծուած իրավիճակը: Զեկուցումով հանդէս եկած է պաշտպանութեան նախարար Կամօ Վարդանեան: Նախարարին համաձայն, լարուածութիւնը շփման գիծի շարք մը հատուածներու մէջ կը շարունակէ պահպանուիլ, եւ Արցախի պաշտպանութեան բանակը կը տիրապետէ իրավիճակին` առանց մարդկային ու դիրքային կորուստներու:

Ըստ աղբիւրին, օրակարգային յաջորդ հարցը կը վերաբերէր Արցախի Հանրապետութիւնը Հայաստանի Հանրապետութեան հետ կապող միջանցքին: Ազրպէյճանական կողմը Արցախի մէջ տեղակայուած խաղաղապահ զօրակազմին միջոցով պահանջ ներկայացուցած է յառաջիկային երթեւեկութիւնը նոր երթուղիով կազմակերպելու վերաբերեալ:

Կը նշուի, որ Անվտանգութեան խորհուրդի նիստին քննարկուած են ստեղծուած իրավիճակին մէջ ձեռնարկուելիք քայլերը, այդ կարգին` նաեւ  ռուսական խաղաղապահ զօրակազմին միջոցով անվտանգ երթեւեկութեան ապահովումը:

aztagdaily.com/archives/553943