Անդրադարձ – Հակադաշնակցութիւն Հուժկու Գրոհների Մերօրեայ Անճարակութիւնը… – ԴԵՐԵՆԻԿ ՄԵԼԻՔԵԱՆ
07 ՕԳՈՍՏՈՍ 2022 – ՀԱՅԱՍՏԱՆ – ՍՓԻՒՌՔ:
Դերենիկ Մելիքեան – Կարդալ նաեւ՝ ՆԱԽՈՐԴ ՅՕԴՈՒԱԾԸ:
ԴԵՐԵՆԻԿ ՄԵԼԻՔԵԱՆ
«ԱԼԻՔ» օրաթերթի գլխաւոր խմբագիր
Հետաքրքիր եւ միաժամանակ սպասելի է այս ժամանակաշրջանում հակադաշնակցութիւն գրոհների սաստկացումը: Առաւել հետաքրքիր է, երբ գրոհների ակունքը գալիս է, ինչ-որ տեղ` պատմական «օրինաչափական» հիմունքներով, թուրանական (նէօ-օսմանական) մերօրեայ ճամբարի ամենատարբեր շերտերից:
Պարզ է, չէ՞, եւ` միաժամանակ փաստ, որ արցախեան դաւադիր պատերազմից ի վեր ձեւաւորուած թուրք-ազրպէյճանական պիղծ դաշինքը հետեւողականօրէն թիրախաւորում է Հայաստանի ընդդիմութեանը` ներքին, իսկ սփիւռքեան ազգային ուժերին` արտաքին ճակատներում, որոնց էլ համարում է հայ-թուրքա-ազրպէյճանական խաղաղ գոյակցութեան ու միմեանց միջեւ հաշտութեան ցանկալի պայմանագիրը կնքելու խանգարիչ-ռեւանշիստներ:
Եւ ի՞նչ ունեցանք ու ինչի՞ ականատեսը եղանք նոյն ամիսների ընթացքում: Օրինակ` պատերազմը տանուլ տուած իշխանութեան կողմից`
Ա.- Ընդդիմութեան շարժման դէմ աննախադէպ բիրտ ուժի կիրառում,
Բ.- Շարժման ակտիւիստների` որպէս քաղբանտարկեալների, կալանաւորում,
Գ.- Ընդդիմադիր ԶԼՄ-ների ու քարոզչական միջոցների դէմ քրէական գործերի յարուցում, հակաիշխանական ուժերի միջեւ պառակտման սերմանում,
Դ.- Միաժամանակ սփիւռքեան համայնքներում փաշինեանամէտ (աւելի ճիշդ հակադաշնակցական բարդոյթներով տառապողներ) ապազգային շերտերի աշխուժացումը` «ֆէյսպուք»-ային տեռորների, լուտանքների ու հայհոյանքների արհեստագիտութեան կիրառմամբ,
Ե.- Եւ վերջին օրինակներով ամենազաւեշտալի հակադաշնակցականութիւնը` Բիւրոյի անդամ Մուրատ Փափազեանի հայրենիք մուտքի արգելումը… նոյնը` ՀՅԴ երիտ.-կառոյցների նկատմամբ…
Սակայն, ի տես թուրքական ճամբարի հակահայկական ու հակահայաստան կեցուածքի անբաւարարուածութեան, տեսնում ենք նաեւ հէնց օրերս թուրք-ազրպէյճանական դաշինքի լկտի, ու փաշինեանական իշխանութեան կողմից անպատասխան մնացող կեցուածքներ, որոնք դարձեալ փաշինեանական իշխանախմբից պահանջում են ռեւանշիստների ու ազգային ուժերի դէմ ճնշումը սաստկացնել, այլապէս, ուղղակիօրէն սպառնում են, որ իրենք ՀՀ-ի դէմ «կը պաշտպանուեն» զինուորական ուժի կիրառմամբ:
Ահա այս օրի են հասցրել մեր երկիր-հայրենին, որի վերջնարդիւնքն թուրքա-ազրպէյճանական նպատակներում Հայաստանն ու հայութեանն լաւագոյն դէպքում թուրքական ծայրագոյն արեւելեան մի վիլայէթ դարձնելն է, կամ էլ ինչպէս կրտսեր թուրքն է ասում արեւմտեան ազրպէյճանի ազատագրուած տարածքի վերածելը…
… Թէեւ ցաւոտ ու ժամանակաւորապէս նահանջ պարտադրող, բայց եւ այնպէս ի զուր են լինելու նոյնիսկ համաթուրանական, համացանցային արտաքին ու թուլամորթ-անհայրենիք ներքին դաւադիրների ընդհանրապէս հակազգային եւ մասնաւորապէս հակա-ՀՅԴ-ական անճարակ ու խելակորոյս գրոհները, քանզի դրանք բոլորը փշրուելու են օրէօր արթնացող հայ ժողովրդի եւ նրա իրական ու հարազատ զաւակների դեռ գալիք զոհողութիւնների շնորհիւ, յար եւ նման` պատմական անբեկանելի բազմաթիւ օրինաչափութիւնների…
aztagdaily.com/archives/554012
