Կազայի Մէջ Իսրայէլեան Ցամաքային Ուժերուն Եւ Պաղեսինցի Զինեալներուն Միջեւ Կատաղի Կռիւներ
01 ՆՈՅԵՄԲԵՐ 2023 – ԱՇԽԱՐՀ – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
Մինչ «Նիւ Եորք Թայմզ» յայտարարեց, որ «Իսրայէլ սկսած է Կազայի մէջ ցամաքային ներխուժման», Իսրայէլի վարչապետ Պենիամին Նեթանիահու երէկ յայտարարեց, որ Իսրայէլ մուտք գործած է Կազայի մէջ Համասի դէմ պատերազմի երրորդ փուլ, որ կ՛ենթադրէ զինուորական գործողութեան ընդլայնում:
«Մենք պատերազմի մէջ ենք: Մենք մեր առջեւ յստակ նպատակ դրած ենք` ոչնչացնել Համասի զինուորական եւ վարչական ներուժը: Մենք ատիկա կ՛ընենք համակարգուած: Նախնական արգելափակման փուլը աւարտած է: Երկրորդ փուլը` անընդհատ շարունակուող օդային յարձակումներն են: Երրորդ փուլը` Կազա ցամաքային ներթափանցման ընդլայնումը», նշուած է Իսրայէլի վարչապետի յայտարարութեան մէջ, որ հրապարակուած է իսրայէլեան կառավարութեան մամլոյ ծառայութեան կողմէ:
Կազայի մէջ ցամաքային գործողութեան նպատակներու շարքին է գերիներու ազատ արձակումը: Նեթանիահու խոստացած է, որ Համասը, ի վերջոյ, «պիտի տապալի եւ պիտի պարտուի», եւ որ ատոր հետեւանքով «այլ Կազա պիտի ըլլայ»:
Իսրայէլի վարչապետը միեւնոյն ժամանակ նախազգուշացուցած է Հըզպալլան հիւսիսէն յարձակում կատարելէ: Անոր համաձայն, այդ պարագային կուսակցութիւնը «կեանքի սխալը» պիտի գործէ:
«Դուք պիտի ստանաք այնպիսի հարուած մը, որ չէք ալ կրնար պատկերացնել», աւելցուցած է Նեթանիահու:
Իսրայէլեան բանակը երէկ յայտարարեց, որ ցամաքային զօրքերուն առաջնորդութեամբ, կատաղի մարտեր կը մղէ Կազայի խորքին մէջ եւ տասնեակ պաղեստինցի զինեալներ սպաննուած են:
Բանակը նշեց, որ յարձակում գործած է պաղեստինեան Համաս շարժումի Կազայի հիւսիսը գտնուող դիրքերուն վրայ, ուր զէնքի մեծ պահեստ յայտնաբերուած է:
Իսրայէլեան բանակը յայտարարեց, որ չորեքշաբթի գիշեր հարուածած է Համասի 300 թիրախ, ներառեալ հակահրասայլային հրթիռներու արձակման վայրեր եւ Համասի պատկանող ստորգետնեայ փապուղիներու մէջ գտնուող զինուորական համալիրներ:
Երէկ Կարմիր ծովու շրջանէն հրթիռ մը արձակուեցաւ Իսրայէլի ուղղութեամբ: Իսրայէլեան լրատուամիջոցներ հաղորդեցին, որ «Հից» հակաօդային համակարգը Իլաթի վերեւ վնասազերծած է նշեալ հրթիռը: Նշեալ լրատուամիջոցները աւելցուցին, որ ասիկա 26 օր առաջ սկսած Կազայի պատերազմէն ի վեր առաջին անգամն է, որ Իլաթի վերեւ սպառնալիք մը կը վնասազերծուի:
Նախքան այդ, անօդաչու թռչող սարք մը Կարմիր ծովէն ներթափանցեց Իլաթ, ուր վար առնուեցաւ:
Եմէնի մէջ Անսարոլլա շարժումին պատկանող կառավարութեան վարչապետ Ապտել Ազիզ Սալեհ պըն Ժապուր ԱՖՓ լրատու գործակալութեան յայտնեց, որ իրենք Կազայի դէմ պատերազմին հակադարձելով Իսրայէլի ուղղութեամբ անօդաչու թռչող սարքեր արձակած են:
Անսարոլլա շարժումի զինուորական բանբեր Եահիա Սարիհ յայտնեց, որ շարժումը մեծաթիւ թեւաւոր հրթիռներ եւ անօդաչու թռչող սարքեր արձակած է «բռնագրաւեալ հողերուն մէջ թշնամիի տարբեր թիրախներու դէմ»:
Իսրայէլեան ձայնասփիւռի կայանը հաղորդեց, որ իսրայէլեան իշխանութիւնները Իլաթի ուղղութեամբ հրթիռարձակման հուսիներու քայլին հակադարձելու հարցը կը քննեն:
Իսրայէլի ազգային անվտանգութեան խորհրդատու Ցահի Հանեկպի յայտնեց. «Կազայի մէջ արգելափակուածները ազատ արձակելու վերաբերեալ համաձայնութեան հեռանկար գոյութիւն չունի, մինչ Իսրայէլ կը շարունակէ Կազայի ցամաքային ներխուժումը»:
Ան նաեւ նշեց, որ Եմէնի հուսիներուն Իսրայէլի վրայ յարձակումները «անհանդուրժելի են», սակայն իսրայէլեան հաւանական հակադարձութեան մասին մանրամասնութիւն չհաղորդեց:
Միացեալ Նահանգներու արտաքին գործոց նախարար Էնթընի Պլինքըն նշեց, որ Կազայի մէջ զինադադարը Համասին առիթ պիտի ընծայէ Իսրայէլի վրայ յարձակումները կրկնելու:
Միւս կողմէ, բրիտանական «Ֆայնենշըլ Թայմզ» օրաթերթը, յղում կատարելով լաւատեղեակ աղբիւրներուն հաղորդեց, որ Իսրայէլի վարչապետ Պենիամին Նեթանիահու կը ջանայ եւրոպացի ղեկավարները համոզել ճնշում բանեցնելու Եգիպտոսի վրայ, որպէսզի ընդունի Կազայէն տեղահանուածները:
Նեթանիահուի առաջարկը Չեխիոյ, Աւստրիոյ եւ կարգ մը այլ երկիրներու կողմէ եւրոպացի ղեկավարներուն փոխանցուած է Եւրոպական Միութեան ղեկավարներու հինգշաբթի եւ ուրբաթ օր տեղի ունեցած վեհաժողովի ընթացքին: Եւրոպական գլխաւոր երկիրները, մասնաւորաբար Ֆրանսան ու Գերմանիան, ինչպէս նաեւ Բրիտանիան մերժած են այդ առաջարկը եւ զայն նկատած ոչ իրատեսական` մատնանշելով Եգիպտոսի շարունակուող ընդդիմութիւնը Կազայէն տեղահանուածներ նոյնիսկ ժամանակաւորապէս ընդունելու գաղափարին:
Եգիպտոսի նախագահ Ապտել Ֆաթթահ Սիսի նախապէս յայտարարած էր, որ իր երկիրը կը մերժէ պաղեստինեան դատի զինուորական միջոցներով կամ պաղեստինցիները իրենց հողերէն բռնի տեղահանելով լուծելու որեւէ փորձ:
aztagdaily.com/archives/597316
