Միացեալ Նահանգներու Նախագահութեան Թեկնածու Քենետի Կը Խոստանայ Աջակցիլ Արցախահայութեան Անվտանգ Վերադարձին Եւ Անոնց Ինքնորոշման Իրաւունքին

Միացեալ Նահանգներու Նախագահութեան Թեկնածու Քենետի Կը Խոստանայ Աջակցիլ Արցախահայութեան Անվտանգ Վերադարձին Եւ Անոնց Ինքնորոշման Իրաւունքին

01 ՅՈՒՆՈՒԱՐ 2024 – ՀԱՅԱՍՏԱՆ – ԱՇԽԱՐՀ – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:

Միացեալ Նահանգներու կառավարութիւնը պէտք է զօրակոչի ենթարկէ միջազգային ընտանիքը, որպէսզի քայլերու ձեռնարկէ եւ ապահովէ Արցախի հայերու անվտանգ վերադարձը հայրենիք, ինչպէս նաեւ պաշտպանէ անոնց ինքնորոշման իրաւունքը:

Այս մասին «Էքս»-ի վրայ հրապարակուած իր տեսաուղերձին վրայ յայտարարած է Ռապըրթ Քենետի կրտսերը, որ իր թեկնածութիւնը առաջադրած է Միացեալ Նահանգներու նախագահի պաշտօնին:

Ան նշած է, որ Ազրպէյճանը, 2020 թուականէն սկսեալ, անխնայ ցեղային զտումներ կը կատարէ Լեռնային Ղարաբաղի հայերուն դէմ: Քաղաքական գործիչը նշած է, որ այս տարուան սեպտեմբերին Ազրպէյճանը յարձակողական գործողութեան ձեռնարկեց եւ 120 հազար հայ` ամբողջ բնակչութիւնը, տեղահանուեցաւ:

Մինչ ամբողջ աշխարհի ուշադրութիւնը սեւեռուած է Կազայի եւ Իսրայէլի վրայ, ոչ ոք ոչինչ կը լսէ «հայկական հնագոյն տարածքներէն մէկուն ամբողջ բնակչութեան զանգուածային արտաքսման» մասին, դժգոհած է Քենետի կրտսերը:

Ան վստահ է, որ այդ ցեղային զտման դատարկ պարսաւանքը բաւարար չէ: Անոր կարծիքով, ներկայիս կացութիւնը կարելի է փոխել:

«Ասիկա այն կացութիւնն է, երբ խաղաղ պատժամիջոցները կրնային աշխատիլ: Միացեալ Նահանգները տակաւին լծակներ ունի այս շրջանին մէջ եւ կրնայ այդ ուժը օգտագործել այս շրջանին մէջ բոլոր ժողովուրդները զօրակոչի ենթարկելու համար` այս մարդասիրական ողբերգութիւնը յաղթահարելու նպատակով:

«Մենք նաեւ պէտք է ուղիներ փնտռենք Թուրքիոյ եւ Ազրպէյճանի կողմէ Հայաստանի շրջափակումը վերացնելու համար: Հայաստանը դէպի ծով ելք չունեցող երկիր է եւ պէտք է մուտք ունենայ դրացի երկիրներու նաւահանգիստներ», կը կարծէ ամերիկացի քաղաքական գործիչը:

Ան վստահեցուցած է, որ Միացեալ Նահանգներու նախագահի պաշտօնին ընտրուելու պարագային պիտի աջակցի Հայաստանի Հանրապետութեան եւ Արցախի վերականգնման:

«Իբրեւ Միացեալ Նահանգներու նախագահ` ես պիտի օգտագործեմ դիւանագիտութիւնը, մեր բարոյական հեղինակութիւնը, մեր տնտեսական լծակները եւ պատժամիջոցները Հայաստանի վերականգնման համար: Ես կ՛ուզեմ նպաստել Հայաստանի, Արցախի գերիշխանութեան վերականգնման: Ես կ՛ուզեմ ատիկա ընել խաղաղ միջոցներով:

«Տեղ մը նոր պատերազմ սկսելու փոխարէն պիտի ուզէի դադրեցնել պատերազմներէն մէկը», յայտարարած է Միացեալ Նահանգներու նախկին նախագահ Ճոն Քենետիի եղբօր` Ռապըրթ Քենետիի որդին:

Նշենք, որ Միացեալ Նահանգներու մէջ նախագահական ընտրութիւնները նախատեսուած են 5 նոյեմբեր 2024-ին:

aztagdaily.com/archives/602928