Հըզպալլան Իսրայէլի Կողմէ Ֆուատ Շուքրի Ահաբեկման Եւ Հարաւային Արուարձաններու Վրայ Յարձակումին Հակադարձութեան Առաջին Փուլը Կատարեց
26 ՕԳՈՍՏՈՍ 2024 – ԼԻԲԱՆԱՆԵԱՆ:
Հըզպալլան երէկ արշալոյսին մեծաթիւ հրթիռներով ու անօդաչու թռչող սարքերով իր զինուորական ղեկավարներէն Ֆուատ Շուքրի ահաբեկման եւ Հարաւային արուարձաններու վրայ յարձակումին «նախնական պատասխան» մը տուաւ` շեշտելով, որ առաջին փուլը յաջողութեամբ պսակուած է:
Հըզպալլա յայտարարեց, որ թիրախաւորած է իսրայէլեան զինուորական տեսակարար թիրախ մը` նշելով, որ այդ մասին պիտի յայտարարէ հետագային:
Կուսակցութիւնը 320 հրթիռներով իսրայէլեան բանակի 11 ռազմակայաններ, զօրանոցներ, դիրքեր եւ հակաօդային պաշտպանութեան «Երկաթեայ գմբէթ» համակարգի հարթակներ հարուածեց:
Հըզպալլա իր հաղորդագրութեան մէջ նշեց, որ այդ զինուորական գործողութիւնները իրենց աւարտին հասնելու համար որոշ ժամանակ պիտի խլեն:
«Մայատին» արբանեակային պատկերասփիւռի կայանը նշեց, որ Հըզպալլայի հակադարձութիւնը Իսրայէլի մէջ 1500 քառակուսի քիլոմեթր տարածութեան վրայ տարածուած է:
Իսրայէլեան անվտանգութեան հարցերով նախարարաց սեղմ խորհուրդը երէկ առտու արտակարգ ժողով մը գումարեց, իսկ կառավարութեան երէկ նախատեսուած լիագումար նիստը յետաձգուեցաւ: Երկրին մէջ 48 ժամուան արտակարգ դրութիւն յայտարարուեցաւ:
Թել Աւիւի «Պեն Կորիոն» օդակայանը փակուեցաւ, եւ 50 թռիչքներ ջնջուեցան: Աքքայի մէջ ելեկտրականութեան հոսանքը Հըզպալլայի ռմբակոծման պատճառով ժամերով ընդհատուեցաւ:
Աւելի ուշ, Հըզպալլան գործողութեան աւարտը յայտարարեց, եւ Թել Աւիւի օդակայանը վերաբացուեցաւ:
Հըզպալլան իր թիրախաւորած իսրայէլեան ռազմակայաններուն եւ զօրանոցներուն լուսանկարները հրապարակեց:
Միւս կողմէ, իսրայէլեան բանակը յայտարարեց, որ 100 ռմբաձիգներ Լիբանանի մէջ աւելի քան 200 թիրախներու վրայ յարձակում գործած են:
Իսրայէլեան կողմը խօսեցաւ Հըզպալլայի վրայ կանխարգելիչ յարձակումի մը շղթայազերծման մասին:
Իսրայէլեան բանակի ձայնասփիւռի կայանը հաղորդեց, որ Իսրայէլի պաշտպանութեան նախարար Եոաւ Կալանթ հեռաձայնային հաղորդակցութիւն մը ունեցած է իր ամերիկացի պաշտօնակից Լոյտ Օսթինի հետ եւ անոր հետ արժեւորումը կատարած Իսրայէլի եւ Լիբանանի միջեւ զարգացումներու կացութեան:
Ձայնասփիւռի կայանը հաղորդեց, որ Կալանթ Օսթինին ըսած է. «Լիբանանի մէջ ճշգրիտ հարուածներ կատարեցինք` ձախողութեան մատնելու համար Իսրայէլի քաղաքացիներուն դէմ անմիջական վտանգ մը: Մօտէն կը հետեւինք Պէյրութի մէջ արձանագրուող զարգացումներուն եւ վճռական ենք մեր քաղաքացիները պաշտպանելու համար` մեր տրամադրութեան տակ գտնուող բոլոր միջոցները օգտագործելու»:
Իսրայէլացի եւ ամերիկացի պաշտօնատարներ ամերիկեան «Աքսիոս» կայքին յայտնած են. «Ուաշինկթըն եւ Թել Աւիւ անցնող 48 ժամուան ընթացքին ստացած են տեղեկութիւններ, որոնք ցոյց կու տան, թէ Հըզպալլան շուտափոյթ յարձակումի կը պատրաստուի»:
Հըզպալլայէն պաշտօնատար մը «Ռոյթըրզ» լրատու գործակալութեան յայտնեց. «Զինուորական հրամանատար Ֆուատ Շուքրի սպանութեան հակադարձութիւնը ուշացաւ քաղաքական պատճառներով, որոնց կարեւորագոյնը Կազայի մէջ հանդարտեցման բանակցութիւններն են»:
«Մենք նախանձախնդիր եղանք վստահ ըլլալու, որ Ֆուատ Շուքրի ահաբեկման հակադարձութիւնը համապարփակ պատերազմի ծագման պիտի չյանգեցնէ», նշած է պաշտօնատարը:
Իսրայէլեան բանակը երեկոյեան հաստատեց, որ իսրայէլեան ծովուժէն զինուոր մը մահացած է: Նախքան այդ, իսրայէլեան լրատուամիջոցներ հաղորդած էին, որ Հըզպալլան երէկ առաւօտեան հարուածած է իսրայէլեան ծովուժին պատկանող «Տաֆորա» տիպի նաւակ մը, այդ պատճառով ալ իսրայէլացի զինուոր մը սպաննուած է եւ շարք մը ուրիշներ վիրաւորուած:
aztagdaily.com/archives/624242
