Սուրիոյ Կառավարութիւնը «Ահաբեկչական Կառավարութիւն» Կոչելով` Շէյխ Հըժրի. «Սուրիայէն Անջատուելու Որոշումը Բանակցելի Չէ»
26 ՄԱՅԻՍ 2026 – ԱՇԽԱՐՀ – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
Շէյխ Հըժրի. «Սուրիայէն Անջատուելու Որոշումը Բանակցելի Չէ
Սուէյտայի մէջ տիւրզիներու հոգեւոր ղեկավար շէյխ Հիքմեթ Հըժրի յայտնեց, որ Ժապալ Պաշանի ինքնակառավարման մարմինի կազմութիւնը Սուրիոյ մէջ Դամասկոսի կառավարութենէն ամբողջովին անջատ է եւ անկէ ետդարձ չկայ:
Շէյխ Հըժրի շեշտեց, որ տիւրզիներու պահանջները բանակցելի չեն, եւ «ինքնորոշման իրաւունքի կիրարկման ուղղութեամբ երթը այլեւս հաստատ քայլերով կ՛ընթանայ` հեռու մնալով տիրապետութենէն խմբաւորումներու, որոնց հետ համակեցութիւնը, ինչպէս իրողութիւնները փաստեցին, անկարելի է»:
«Այս լերան վրայ չկայ որեւէ ղեկավարութիւն կամ իշխանութիւն, բացի անոր ժողովուրդին կողմէ ընտրուածէն», աւելցուց ան:
Հըժրի շնորհակալութիւն յայտնեց «տիւրզիներու դատին» աջակցող պետութիւններուն ու կազմակերպութիւններուն, յատուկ կերպով շնորհակալութիւն յայտնելով Իսրայէլին, անոր կառավարութեան եւ ժողովուրդին:
Ան մերժեց տիւրզիներուն նկատմամբ որեւէ լիազօրութիւն չունեցող արտաքին կողմերու միջամտութիւնը` ընդգծելով, որ տիւրզիները իրենց իրաւունքները պիտի խլեն, եւ անոնք աւելի լաւ գիտեն իրենց հարցերն ու շրջանը ինչպէս կառավարել:
«Իրողական կացութեան ուժերը պիտի չկարենան իրենց հոգատարութիւնը բռնի ուժով եւ ապակողմնորոշումով պարտադրել», ըսաւ ան` այդ ջանքերը որակելով «բացայայտ փորձեր»:
Սուէյտայի մէջ տիւրզիներու հոգեւոր պետը Սուրիոյ կառավարութիւնը որակեց «ահաբեկչական կառավարութիւն»` պահանջելով զայն միջազգային օրէնքին հիմամբ դատել` անոր կատարած խախտումներուն եւ ոճիրներուն համար:
Ան ըսաւ, որ գլխաւոր նպատակը նախայարձակներուն պարտադրելն է, որպէսզի գործադրեն յուլիս 2025-ի զինադադարին մէջ որոշուած միջազգային լուծումը` առեւանգեալները վերադարձնել, բռնի անհետ կորսուածները բացայայտել եւ տիւրզիական գիւղերն ու գիւղաքաղաքները ազատագրել:
Տիւրզի ղեկավարը շնորհակալութիւն յայտնեց դաշնակիցներուն եւ միջազգային զօրակիցներուն, որոնք տիւրզիական ինքնակառավարման մարմինն ու Ժապալ Պաշանի վրայ անոր ամբողջական գերիշխանութիւնը «իբրեւ կայուն իրողութիւն» ամրապնդելու ջանքեր կը թափեն:
Շէյխ Հըժրի ընդգծեց, որ լերան պաշտպանութիւնը եւ անոր հաստատութիւններու կառուցումը միասնական խնդիր է, որ կը միաւորէ բոլոր տիւրզիները` միաւորելով ջանքերը եւ հետեւելով հանրային շահերուն ծառայող համապարփակ վարչական ուղեցոյցերուն:
aztagdaily.com/archives/689152
