08 փետրուար 2016
Ռուսիոյ Դաշնութեան Պետական դումայի` Կոմունիստական կուսակցութենէն պատգամաւորներ Վալերի Ռաշգինն ու Սերգէյ Օպուխովը նամակ յղած են Ռուսիոյ նախագահին ու արտաքին գործոց նախարարին:
Վկայակոչելով «Իզվեսթիա» թերթը՝ Artsakhpress.am-ը կը հաղորդէ, որ նամակով անոնք կ՝առաջարկեն չեղեալ համարել Մոսկուայի 1921 Մարտ 16-ի ռուս-թրքական բարեկամութեան ու եղբայրութեան մասին պայմանագիրը:
Իրենց նամակին մէջ իրենց քայլը պատգամաւորները հիմնաւորած են Թուրքիոյ յարձակողական պահուածքով:
Ռուսական ԶԼՄ-ներուն տրամադրութեան տակ յայտնուած նամակին մէջ հիմնաւորումներու շարքին նշուած է նաեւ, որ «Վրաստանը եւ Հայաստանը չեն ճանչնար պայմանագրի պայմանները` զայն համարելով ոչ արդարացի»
:
Կը նշուի, որ այս նախաձեռնութիւնը կը սատարէ նաեւ «Արդար Ռուսիա» կուսակցութիւնը:
Աղբիւրը կը յիշեցնէ, որ Հայաստանը չ՝ընդունիր Մոսկուայի ու Կարսի պայմանագիրները, որոնցմով պոլշեւիկեան Ռուսիան Թուրքիոյ յանձնեց Կարսի նահանգը, Սուրմալուն` Արարատ լեռով հանդերձ:
Կը յիշեցնեն նաեւ, որ 2005-ին Վրաստանը չեղեալ համարած է Կարսի պայմանագիրը: Իսկ մինչ այդ նման փորձեր ըրած է նաեւ խորհրդային իշխանութիւնը, սակայն Ստալինի մահէն ետք փորձերը դադրեցուած են:
ԵՌԱԳՈՅՆ
http://www.yerakouyn.com
