11 փետրուար 2016
ԹԱՍՍ հաղորդեց, որ Ռուսիոյ արտաքին գործոց նախարարութեան բանբեր Մարիա Զախարովա յայտարարած է, որ Ռուսիոյ արտաքին գործոց նախարարութիւնը պիտի ուսումնասիրէ Տումայի երեսփոխաններու 16 մարտ 1921-ի ռուս-թրքական բարեկամութեան ու եղբայրութեան մասին համաձայնագիրը ջնջելու առաջարկը:
«Ռուսիոյ արտաքին գործոց նախարարութիւնը ստացած է Տումայի խումբ մը երեսփոխաններուն առաջարկը` կասեցնելու համաձայնագիրը: Այս պահուս առաջարկը պէտք է ուսումնասիրուի: Ամէն ինչ պիտի կատարուի սահմանուած կարգով: Առայժմ պէտք է ուսումնասիրուի նախաձեռնութիւնը», ըսած է Զախարովա:
Յիշեցնենք, որ Ռուսիոյ Տումային մէջ Համայնավար կուսակցութեան երեսփոխաններ Վալերի Ռաշքին եւ Սերկէյ Օպուշով Ռուսիոյ նախագահ Վլատիմիր Փութինին ու արտաքին գործոց նախարար Սերկէյ Լաւրովին նամակ յղած են` առաջարկելով ջնջել 16 մարտ 1921-ի Մոսկուայի ռուս-թրքական բարեկամութեան ու եղբայրութեան մասին համաձայնագիրը: Անոնք իրենց քայլը հիմնաւորած են Թուրքիոյ յարձակողապաշտ կեցուածքով:
ԱԶԴԱԿ
http://www.aztagdaily.com
