ԵՐԵՒԱՆ, «Արմէնփրէս».– 22 Դեկտեմբերին Հայաստանի պաշտպանութեան նախարարի մամլոյ խօսնակ Արծրուն Յովհաննիսեան լրագրողներուն հետ ունեցած հանդիպումին ընթացքին յայտնած է, որ Ատրպէյճան «իր յատուկ նշանակութեան ուժերի հիւծման ճանապարհով է գնում»:
«Դուք ինքներդ կարող էք նկատել, որ հակառակորդի մօտ վերջին երկու տարիներին շեշտակի նուազել են ժամկէտայինների զոհերը եւ աւելացել են պայմանագրային եւ սպայական զոհերը: Դա ինչի՞ մասին է խօսում, այսինքն՝ այսպէս ասած, «Ոսկէ ֆոնդ»ի հիւծման ճանապարհով են գնում», հաստատած է Արծրուն Յովհաննիսեան:
Ըստ անոր՝ դիրքեր կը բերուին հրետանիներ, եւ կը ռմբակոծեն, իսկ աւելի վտանգաւոր է «Դ–30» թնդանօթներու գործածութիւնը: Սահմանին վրայ Ատրպէյճան լարուածութիւնը հասցուց այնպիսի մակարդակի, որ հոն կանգնած գունդերու եւ ջոկատներու սպառազինութեան մէջ եղած ամբողջ պաշարը օգտագործուած է, զօրամասերուն մէջ չէ մնացած զինատեսակ մը, որ չէ կիրարկուած։
Ըստ Յովհաննիսեանի՝ ատրպէյճանական կողմը տարեսկիզբէն մինչեւ օրս ունի երկու հարիւրէ աւելի զոհ: «Այս պահի դրութեամբ կարող եմ ասել, որ ադրբեջանական կողմից զոհերի թիւն անցնում է 210ը: Վերջնական թուեր նշելը դժուար է, քանի որ պէտք է տարբեր աղբիւրներից ամբողջացնել», ըսած է ան։
Արծրուն Յովհաննիսեան շեշտած է, որ Լեռնային Ղարաբաղի հակամարտութեան մասին խօսելու ատեն անիմաստ է օգտագործել «հրադադարի խախտում» եզրը, քանի որ «հրադադար մենք, ըստ էութեան, այլեւս չունենք»:
«Մենք չունենք խաղաղութիւն, մենք ունենք յարաբերական հանգիստ», յայտնած է Յովհաննիսեան՝ աւելցնելով, որ նախորդ գիշեր հայ-ատրպէյճանական սահմանին վրայ ու շփման գիծին մէջ համեմատաբար խաղաղ էր վիճակը:
Անդրադառնալով շփման գիծին մէջ Ատրպէյճանի կողմէ տարբեր զինատեսակներու օգտագործման՝ Արծրուն Յովհաննիսեան նկատել տուած է, որ հակառակորդը այդպիսով կ՛ուզէ լուրջ վնաս հասցնել հայկական կողմին, բայց չի յաջողիր, ընդհակառակն աւելի հուժկու հակահարուած կը ստանայ:
Յովհաննիսեանի համաձայն՝ պատերազմական իրավիճակին մէջ գործողութիւններու արդիւնաւէտութիւնը կ՛որոշուի հակառակորդին առաջադրած խնդիրներու, գործողութիւններու խափանումով: Իսկ Լեռնային Ղարաբաղի տագնապի գօտիին մէջ հակառակորդը ամէն անգամ կը ձգտի շատ աւելի մեծ վնասներ պատճառել, քան մէկ–երկու զոհ, սակայն հայկական կողմը ամէն անգամ կարելիութիւն չի տար, կը խափանէ այդ ծրագիրները:
«Այդուհանդերձ, հայկական կողմը չի կարող բացել փակագծերն ու ասել, թէ կանխարգելիչ ինչ միջոցառումներ են ձեռնարկւում՝ խափանելու հակառակորդի այս կամ այն ձեռնարկը», ըսած է ան:
Ազատ Խօսք – Ելեկտրոնային Անկախ Պարբերաթերթ
կայք էջ : www.azadkhosk.com
Խմբագիր – Երան Գույումճեան
Թիւ (54) Յունուար 2016
