12 ՓԵՏՐՈՒԱՐ 2016
Թրքական «Հապերլեր» կայքը կը հաղորդէ, որ Սուրիոյ քրտական Ժողովրդավարական միութիւն կուսակցութեան ղեկավար Սալիհ Մուսլիմ «Ամերիկայի ձայն» ձայնասփիւռի կայանին հետ հարցազրոյցի մը ընթացքին յայտարարած է, որ քրտական ուժերը ՏԱՀԵՇ-ի դէմ պայքարին մէջ առանց Միջազգային դաշինքի ուժերուն հետ համակարգում կատարելու պիտի չանցնին Եփրատ գետի արեւմտեան ափը:
Ան ընդգծած է, որ իրենց գլխաւոր մտահոգութիւնը Թուրքիոյ մասնակցութիւնն է սուրիական պատերազմին: Մուսլիմի խօսքերով` այժմ Սուրիոյ հիւսիսը տեղի ունեցող բախումները չեն ընդգրկեր քրտական տարածքները, այլ կ՛ընթանան միայն մերձակայ շրջաններու մէջ, իսկ քրտական ուժերը այդ բախումներուն մասնակցութիւն չունին:
Ըստ անոր, այդ բախումներուն կը մասնակցին միայն Ժողովրդավարական միութիւն կուսակցութեան զինեալ թեւը հանդիսացող Ժողովուրդի պաշտպանութեան ուժերու որոշ արաբ դաշնակիցներ, որոնք նախապէս կռուած են Ժապհաթ Նուսրա ահաբեկչական կազմակերպութեան դէմ:
«Թրքական ջոկատներու եւ Սուրիոյ մէջ գործող զինեալ խմբաւորումներու միջեւ ապագային դաշնակցութեան հարց կրնայ յառաջանալ, եւ անոնք քրտական տարածքներու դէմ կրնան եւ յարձակում գործել», ըսած է Մուսլիմ:
Յիշեցնենք, որ Թուրքիոյ նախագահ Ռեճեփ Թայիփ Էրտողան նախապէս յայտարարած էր, որ իրենք երբեք պիտի չարտօնեն, որ քրտական ուժերը անցնին Եփրատ գետի արեւմտեան ափը:
ԱԶԴԱԿ
http://www.aztagdaily.com
