26 ՓԵՏՐՈՒԱՐ 2016
ԵՐԵՒԱՆ, «Նիուզ».– Արցախի Հանրապետութեան վարչապետ Արա Յարութիւնեան 26 Փետրուարին հանդիպում ունենալով Ատրպէյճանէն բռնագաղթած գաղթականներու ներկայացուցիչներուն հետ, ըսած է, որ Լեռնային Ղարաբաղի կառավարութիւնը յանձն կ՛առնէ նաեւ գաղթականներու բնակարանային պայմաններու բարելաւման աշխատանքը, «քանի որ սա նաեւ նրանց պետութիւնն է»:
«ԽՍՀՄ վերջին տարիներին խորհրդային Ադրբեջանում հարիւր հազարաւոր հայեր ջարդերի եւ բռնաճնշումների են ենթարկուել, որոնց միջազգային պատշաճ դատապարտման ու իրաւական գնահատական տալու գործում դեռեւս ճանապարհ ունենք անցնելու: Բռնաճնշումների հետեւանքով, ադրբեջանաբնակ հայութեան մի հատուած տեղափոխուեց Արցախ՝ դառնալով մեր հասարակութեան լիարժէք մասնիկ:
Տարիներ անց, լուծելով սոցիալական առաջնահերթ խմբերի բնակարանային խնդիրները, այժմ կառավարութիւնը յանձն է առնում նաեւ փախստականների բնակարանային պայմանների բարելաւման գործը, քանի որ սա նաեւ նրանց պետութիւնն է», ըսած է վարչապետը:
Ըստ անոր՝ նախորդ տարիներուն հանրապետութեան մէջ գաղթականի կարգավիճակ տրուած է հազարաւոր ընտանիքներու, որոնց մէկ մասը բնակարանային պայմաններու բարելաւման կարիք ունի:
Սակայն պէտք է այս գծով յաւելեալ ուսումնասիրութիւն կատարուի, ուստի՝ վարչապետը գաղթականներուն առաջարկած է իրենց եւ նման պարագաներու մէջ եղողներուն մասին մանրամասնութիւն տալ։ Ըստ նախնական քննարկման՝ բնակարանային պայմաններու բարելաւման ծրագիրէն առաջին հերթին պիտի օգտուին հաշմանդամութիւն ունեցող, սպայական անձնակազմի եւ բազմազաւակ ընտանիքները:
Բացի անկէ, կառավարութիւնը յառաջիկային պիտի սկսի փոխհատուցել վարձքով ապրող գաղթական ընտանիքներու տուած վարձքերը՝ նախքան անոնց այլ բնակարան տրամադրելը։
Արա Յարութիւնեանի համաձայն՝ պիտի շարունակուի նաեւ հանրակացարաններուն մէջ ապրող գաղթականներու բնակարանային պայմաններու բարելաւման ծրագիրը:
«Այս մասշտաբային կարեւոր ծրագիրը պէտք է իրագործուի թափանցիկ միջավայրում4 ձեզ հետ քննարկելով մանրամասները եւ ձեզնից ստանալով խնդիրների լուծման առաջարկներ: Այդ նպատակով առաջիկայում ստեղծուելու է աշխատանքային խումբ՝ կազմուած փախստականների եւ կառավարութեան աշխատակազմի ներկայացուցիչներից, որը ձեռնամուխ կը լինի նոր ծրագրի կարգի մշակմանը եւ իրագործմանը», յայտնած է վարչապետը։
ԱՍՊԱՐԵԶ
www.asbarez.com
