02 ՄԱՐՏ 2016
ԱՄՆ-ի մէջ հրատարակուած է Մասաչուսէթսի արուեստաբանութեան հիմնարկի (MIT) դասախօս, պատմաբան Լեռնա Էքմէքչիօղլուի «Հայաստանի վերականգնումը. Պատկանելիութեան սահմանափակումները Թուրքիոյ մէջ ցեղասպանութենէն ետք» գիրքը:
Սթենֆորտի համալսարանին կողմէ հրատարակուած գիրքը հեղինակի խորքային հետազօտութիւնն է Հայոց ցեղասպանութեան հետեւանքներուն եւ ատկէ ետք Թուրքիա մնացած հայերուն մասին:
Հեղինակը կ’անդրադառնայ Առաջին աշխարհամարտէն ետք Թուրքիոյ մէջ հայերու վիճակին` նկարագրելով, թէ այդ երկրին մէջ ինչպէս հայերուն կը վերաբերին որպէս դաւաճաններու:
Աշխատութեան մէջ հեղինակը կը պատմէ այդ ժամանակաշրջանին Թուրքիոյ մէջ հայկական շրջանակներու հանրային գործիչներու մասին, ինչպէս Սթամպուլի մէջ տպագրուող «Հայ կին» ամսագիրի խմբագիր Հայկանոյշ Մարքն է:
Ան կը մարմնաւորէ հայ կնոջ կերպարը, որ բարդ ժամանակաշրջանի մէջ առանցքային դեր կը խաղայ հայ մշակոյթի, ինքնութեան եւ աւանդոյթներու պահպանման գործին մէջ:
Լեռնա Էքմէքչիօղլուն դուստրին հետ
Հայկանոյշ Մարքը հանդէս կու գար նաեւ ի պաշտպանութիւն կանանց իրաւունքներուն: Այսպիսով, հեղինակը փորձած է ներկայացնել այդ ժամանակաշրջանին հայ կանանց դերակատարութիւնը Թուրքիոյ մէջ հայկական ինքնութեան պահպանման գործին մէջ:
Ըլլալով հայ` Լեռնա Էքմէքչիօղլուն կ’ընդգծէ, որ ներկայիս Թուրքիոյ մէջ իրեն պէս բազմաթիւ հայերու չեն թոյլատրեր դասաւանդել դպրոցներուն մէջ` ազգային պատկանելիութեան պատճառով:
«Այն պատմութիւնը, զոր դասաւանդած են դպրոցէն ներս, ամբողջութեամբ կը հակասէր այն պատմութեան, որուն մասին ինծի կը պատմէին տունը: Ես մեծցած եմ ընտանիքի մը մէջ, ուր կը խօսէին այդ դէպքերուն մասին եւ ջանքեր կը գործադրէին` արթուն պահելու մեր յիշողութիւնը»,- mediamax.am-ի փոխանցմամբ` կը նշէ հեղինակը:
Հեղինակը նաեւ ըսած է, որ Հայոց ցեղասպանութեան 100-րդ տարելիցէն ետք Թուրքիոյ մէջ աննախադէպ քննարկումներ կը ծաւալին կատարուածի եւ այդ երկրին մէջ հայերու ներկայութեան մասին:
ԵՌԱԳՈՅՆ
http://www.yerakouyn.com
