09 ՄԱՐՏ 2016
Թուրքիոյ մարդու իրաւունքներու կազմակերպութիւնը հայերը վիրաւորելու հիմնաւորմամբ Սթամպուլի Չաղլայան արդարադատութեան պալատ դատական հայց ներկայացուցած է վարչապետ Ահմէտ Տաւութօղլուի եւ Աշքալէի քաղաքապետ Էնվեր Պաշարանի դէմ: Ինչպէս կը հաղորդէ «Արմէնփրէս»-ը, այս մասին կը տեղեկացնէ թրքական Demokrathaber.net-ը:
Տաւութօղլու Փետրուար 27-ին Պինկէոլնի մէջ (Բիւրակն) ունեցած ելոյթին ժամանակ քննադատած էր քրտամէտ Ժողովուրդներու դեմոկրատական կուսակցութիւնը` մեղադրելով զանոնց «հայկական հրոսակախումբերու նման ռուսերու հետ համագործակցելուն» մէջ:
Աւելի ուշ` Մարտ 3-ին վարչապետին խօսքերը Աշքալէի մէջ կազմակերպուած համագումարին ժամանակ կրկնած էր Պաշարան` շնորհակալութիւն յայտնելով «փառապանծ նախնիներուն, որոնք այս հողերէն մաքրած, նետած են հայերը»:
Սթամպուլի Չաղլայան արդարադատութեան պալատին մօտ հաւաքուած իրաւապաշտպանները նախքան հայցը ներկայացնելը յայտարարութիւն մը ըրած են` ընդգծելով, որ ամիսներ շարունակ երկրի քրտաբնակ շրջաններուն մէջ թրքական զինուժին կողմէ իրականացուող գործողութիւնները կը զուգորդուին հայերու դէմ ցեղապաշտական քայլերով:
Օրինակ, վճարուած հարկերէն գոյացած գումարով գնուած զրահամեքենաները կը շրջին փողոցներով եւ կը յայտարարեն. «Բոլորդ հայ էք, բոլորդ հայ վիժուածքներ էք»:
«Հայերու դէմ ցեղասպանութիւն իրականացուած է, անոնց հարստութիւնը բռնագրաւուած, հայերու ու միւս քրիստոնեայ ժողովուրդներու մշակութային ժառանգութիւնը համակարգուած կերպով ոչնչացուած է:
Կարծես այս ամէնը բաւական չէ, հանրապետութեան ողջ պատմութեան ընթացքին եւ նոյիսկ այսօր մնացած բուռ մը հայերուն ստորացնելու, անոնց կեանքը սպառնալիքի ենթարկելու նպատակով կ’ըլլայ հնարաւոր ամէն բան:
«Այս ամէնը պատմութեան գիրկը անցած է եւ կը շարունակէ անցնիլ որպէս մարդկութեան դէմ յանցագործութիւն: Գալիք սերունդներն ալ ձեզի ատով պիտի յիշեն: Խտրականութիւնը թրքական պետութեան նոյիսկ ամենաբարձր մակարդակի վրայ կը շարունակեն ընել ու խրախուսել:
Սակայն կան նաեւ այնպիսիները, որոնք մինչեւ վերջ իրենց ձայնը կը բարձրացնեն ընդդէմ այս յանցագործութեան»,- նշած են իրաւապաշտպան կազմակերպութեան անդամները:
ԵՌԱԳՈՅՆ
www.yerakouyn.com
