12 ՄԱՐՏ 2016
Իպրահիմ Ժաաֆարի
Իրաքի արտաքին գործոց նախարար Իպրահիմ Ժաաֆարի Գահիրէի մէջ Արաբական լիկայի ժողովին ընթացքին իր արտասանած խօսքին մէջ պաշտպանած է Հըզպալլան, ինչ որ պատճառ դարձած է, որ սէուտական պատուիրակութիւնը հեռանայ ժողովէն:
Աղբիւր մը Իրանեան լրատու գործակալութեան յայտնեց, որ Ժաաֆարի յայտարարած է. «Ան որ Ժողովրդային դիմադրութիւնն ու Հըզպալլան կ՛ամբաստանէ ահաբեկչութեան յանցանքով, ինքն է, որ կ՛աջակցի ահաբեկչութեան եւ կ՛որդեգրէ զայն»:
Ժաաֆարի զօրակցութիւն յայտնած է Հըզպալլային` ընդգծելով, որ Ժողովրդային դիմադրութիւնն ու Հըզպալլան «արաբներու պատիւը պաշտպանեցին»: Ան նշած է. «Հըզպալլայի ընդհանուր քարտուղար Հասան Նասրալլան արժէքներն ու սկզբունքները պաշտպանող արաբ հերոս մըն է»:
Իրաքի արտաքին գործոց նախարարութենէն աղբիւր մը «Սումարիյա Նիուզ»-ին յայտնած է, որ սէուտական պատուիրակութիւնը Ժաաֆարիի արտասանած խօսքէն ետք հեռացած է Արաբական լիկայի ժողովի սրահէն:
Յիշեցնենք, որ Ծոցի համագործակցութեան խորհուրդն ու արաբ ներքին գործոց նախարարները անցեալ շաբաթ անջատաբար Հըզպալլան նկատած էին «ահաբեկչական կազմակերպութիւն»:
Միւս կողմէ, Իրանի հետ ճգնաժամի զարգացումներուն եւ արաբական ներքին հարցերուն անոր միջամտութեան դիմակայման միջոցներու քննարկման հարցով Արաբական նախարարական քառանդամ յանձնախումբը դատապարտեց իրանեան միջամտութեանց շարունակութիւնը:
Յանձնախումբը լիկայի կեդրոնատեղիին մէջ երէկ գումարած իր ժողովին ընթացքին Իրանէն պահանջեց դադրեցնել միջամտութիւնները, որոնց շարքին` ահաբեկչական ու խափանարարական արարքներու իր աջակցութիւնը, ինչպէս նաեւ արաբական երկիրներուն դէմ իրանցի պաշտօնատարներու թշնամական եւ գրգռիչ յայտարարութիւնները:
Յանձնախումբը Իրանին կոչ ուղղեց յարգելու արաբական երկիրներու գերիշխանութիւնն ու բարի դրացնութեան սկզբունքը: Յանձնախումբը իր որոշումները յղեց Արաբական լիկայի նախարարական մակարդակով խորհուրդին:
ԱԶԴԱԿ
www.aztagdaily.com
