Նամակ Երկրէն
ՈՎՔԵ՞Ր ԵՆ ԴԱՒԱՃԱՆՆԵՐԸ
Անցեալ տարի, խորհրդարանական ընտրութիւններու նախօրեակին, ՀԱԿի ղեկավար Լեւոն Տէր Պետրոսեանը բաւական աշխուժացած էր։ ՀԱԿի ընտրարշաւի գլխաւոր թեման Արցախի հիմնահարցն էր, և մի՛ զարմանաք, հողային զիջումներու քարոզը։
ՀԱԿ-ին և ԼՏՊ-ին աշխուժացման նպաստեցին նաև օրուան իշխանութիւնները՝ այդ օրերուն ԼՏՊ-ի հետ քաղաքական flirtation-ի մէջ մտած Սերժիկի ղեկավարութեամբ։ Յանկարծ պետական հեռուստացոյցը, ռատիոն, Սերժիկի ենթակայ կուսակցական և մասնաւոր մետիան լայն տեղ տուին ՀԱԿ-ին և ԼՏՊ-ին, որոնք շարունակաբար քարոզեցին հողային զիջումներ կատարելու կարևորութիւնը՝ յանուն խաղաղութեան ու չգիտեմ ինչի։
Դիտեցէ՛ք ներքեւի հարցազրոյցը ԼՏՊի հետ, որպէսզի յիշէք, թէ ինչե՜ր կ’ըսէին այդ օրերուն ՀԱԿն ու ԼՏՊն։ Շատ աւելի վատ՝ քան Զոյայի վերջին ցափռտուքները։
Ու՜ր էին այդ օրերուն Զոյային դատի տուողները, ժողովրդային ապստամբութեան կոչեր ընողները, կախաղան բարձրացնողները, և դուրսի ու ներսի Զոյաֆոպիայով տառապող մունետիկները։
Հիմա կարելի է փոթորիկ բարձրացնել Զոյայի դէմ, իսկ մէկ տարի առաջ՝ ո՞չ։ Ի՞նչ նպատակ կը հետապնդէք, ձեր հարուածը որու՞ն ուղղուած է, Զոյայի՞ն, Զոյայի ղեկավարի՞ն, տարի մը առաջ ԼՏՊի քարոզչութեան ազատ բեմ շնորհած Սերժիկի՞ն, թէ Սերժիկ տապալած Նիկոլին։
Ի դէպ, ես «ոչ մի թիզ»ական եմ, ԼՏՊի բնորոշումով՝ հայրենիքի դաւաճան եմ։
Բայց ես դաւաճան չեմ համարեր ՀԱԿականները, հակառակ իրենց զիջողական քաղաքականութեան։ Ժողովուրդը չէ՛ ընտրած իրենց ուղին, անոնք վաղուց մերժուած են հայ ժողովուրդի բացարձակ մեծամասնութեան կողմէ։ Անոնք ժողովուրդի ընտրութիւնը չեն։
ԱԿականներն ու իրենց ղեկավարները դաւաճաններ չեն: Անոնք լուսանցքի վրայ շպրտուած են արդէն:
Դաւաճանները անոնք են, որոնք կը գողնան մեր սահմանները պաշտպանող, մեր հողերը պահող, մէկ թիզ հողի համար կեանք տուող զինուորներուն ճաշը, հագուստը, սնունդը, վառելանիւթը, զէնքի գումարը, յետոյ ալ՝ մեծ-մեծ ռազմահայրենասիրութիւն կը քարոզեն։
Դաւաճանները՝ ժողովուրդի ընտրութիւնը այս «ռազմահայրնասէր» գողերուն օգտագործումով կեղծողներն են։ Դաւաճանները այս գողերուն հովանաւորողներն են։
Դաւաճանները այս տեսակի ստահակներուն, այս ազգակործան խաչագողներուն հանդուրժողներն են, անոնց սուտ քուէներով ընտրուողները։
Նորէն կրկնեմ։ Ես «ոչ մի թիզ»ական եմ, ԼՏՊի բնորոշումով՝ հայրենիքի դաւաճան…ու ռազմահայրենասիրութեամբ չեմ սիրեր զբաղիլ։ Դէմ եմ նաև այս վերջինի կեղծ հովանաւորներուն։
Բայց ես ամէն շաբաթ «գրաւուած» տարածքներ կ’այցելեմ ու մեր Հիմնադրամի միջոցներով բնակարաններ, դարմանատուներ, դպրոցներ կը սարքեմ, այգիներ կը հիմնեմ, ջրագիծեր կը նորոգեմ, ներդրումներ կը կատարեմ։ Երբեմն յաջող, երբեմն՝ ոչ։
Հպարտ եմ իմ «դաւաճանութեամբ»…
Րաֆֆի Տուտագլեան
Գրեցէք ինծի։
rafdoud@aol.com
ՀՀ առաջին նախագահը Ղարաբաղյան հարցի շուրջ
Բացառիկ հարցազրույց, ՀՀ առաջին նախագահը Ղարաբաղյան հարցի շուրջ, Տարածեք Թող ամբողջ աշխարհը տեսնի
Posted by Դուխով Ազգ Հայեր on Friday, July 20, 2018
