23 ՕԳՈՍՏՈՍ 2018 – ՄՇԱԿՈՅԹ:
Սփիւռքի նախարարութեան աջակցութեամբ օգոստոս 23-ին «Թէքէեան կեդրոն» հիմնադրամի ցուցասրահին մէջ տեղի ունեցաւ «Աւանդ` Աղթամարի» խորագիրով վանեցի հայերու աւանդական տարազներու լուսանկարներու ցուցահանդէսի բացման արարողութիւնը:
Տարազներու հեղինակը պոլսահայ արուեստաբան Ժուլիա Մութլուն է, լուսանկարիչը` բնիկ վանեցի, աւանդական ժողովրդական մշակոյթներու մասնագէտ, լուսանկարիչ Այթաչ Արազ Սելչուկը: Ձեռնարկին աջակցած են Մաքրուհի եւ Գէորգ Յակոբեանները` կատարելով հայկական նախկին տեղանուններու եւ սրբավայրերու ստուգումն ու հայերէն թարգմանութիւնները:
Ցուցահանդէսի բացման արարողութեան կը մասնակցէր նաեւ սփիւռքի փոխնախարար Արամայիս Գրիգորեան, որ ներկաներուն փոխանցեց նախարար Մխիթար Հայրապետեանի ողջոյնի խօսքը. « Տիկին Ժուլիա Մութլուին քաջածանօթ է հայ հասարակութեան. մենք քանի մը անգամ արդէն բախտը ունեցած ենք հանդիպելու զինք, վայելելու անոր բարձրարուեստ գործունէութեան արգասիքը, մասնակցելու անոր հեղինակած ազգային տարազներու աննախադէպ ցուցադրութեան Երեւանի մէջ եւ մեր հիացմունքն ու գոհունակութիւնը յայտնած այդ առթիւ: Տիկին Մութլուն մասնակից ու համահեղինակ է նաեւ այս ձեռնարկին եւ միայն իրեն յատուկ վարպետութեամբ պատրաստած է 19 տարազ, որոնք տաղանդաշատ լուսանկարիչ Այթաչ Արազ Սելչուքի երեւակայութեան եւ մտքի թռիչքի ուժով դարձած են ինքնատիպ ու առինքնող լուսանկարներ»:
Այթաչ Արազ Սելչուքն առաջին անգամ Հայաստան կ՛այցելէ, վերջինս շրջած է Վանի գիւղերով ու գիւղաքաղաքներով, եղած բոլոր այն վայրերուն մէջ, ուր մէկ դար առաջ ապրած են հայեր ու ստեղծած յառաջադէմ քաղաքակրթութիւն: Ան գտած է սրբավայրեր, քանդուած վանքեր ու եկեղեցիներ, մկրտարաններ ու խաչքարեր, մարմարէ կիսաքանդ յուշարձաններ, հայատառ տապանաքարեր ու ատոնց մօտ լուսանկարած հայկական տարազներ հագած երիտասարդներ ու աղջիկեր:
« Այսօրուան ցուցահանդէսն իր բնոյթով փաստագրական է եւ ունի պատմական նշանակութիւն: Այն վստահաբար պիտի համալրէ Պոլսոյ հայկական համայնքի հայապահպան գործունէութեան համայնապատկերը եւ պիտի դառնայ անոր ինքնատիպ էջերէն մէկը: Այս ամէնուն համար շնորհակալութիւն կը յայտնեմ տիկին Ժուլիա Մութլուին եւ պարոն Այթաչ Արազին, կը ցանկամ անոնց նորանոր յաջողութիւններ իրենց ձեռնարկներուն մէջ»-աւելցուց փոխնախարարը:
Արամայիս Գրիգորեան շնորհակալութիւն յայտնեց Պոլսոյ հայ համայնքին, այն արուեստագէտներուն ու մշակութային գործիչներուն, որոնք անմնացորդ սիրով կը շարունակեն պահպանել ազգային հայկական արժէքները, կը ստեղծեն նորերը եւ արժանապատիւ կեցուածքով ատոնք կը ներկայացնեն աշխարհին:
Փոխնախարարը շնորհակալութիւն յայտնեց նաեւ «Թէքէեան կեդրոն» հիմնադրամի տնօրինութեան ցուցասրահը սիրով տրամադրելու համար:
Ցուցահանդէսը կը գործէ մինչեւ օգոստոս 26:
hayernaysor.am/cl/archives/291454
