12 ՀՈԿՏԵՄԲԵՐ 2018 – ՀԱՅԱՍՏԱՆ – ԱՇԽԱՐՀ – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
Հայաստանի հանրապետութէան նախագահ Արմէն Սարգսեան եւ տիկին Նունէ Սարգսեան, Ֆրանսայի Հանրապետութեան նախագահ Էմանուէլ Մաքրոն եւ տիկին Պրիճիթ Մաքրոն Երեւանի մէջ` «Շարլ Ազնաւուր» կեցավայրին մէջ, Հոկտեմբեր 11ին, մասնակցեցան «Ազնաւուր» կեդրոնի նախագիծի ներկայացման արարողութեան:
ֆրանսահայ երգիչին որդին` Նիքոլա Ազնաւուր, որ նաեւ «Ազնաւուր» հիմնադրամի հիմնադիրն է, եւ տնօրէն Քրիսթինա Սարգսեան ներկայացուցին «Ազնաւուր» կեդրոնի նպատակներն ու գործունէութեան ուղղութիւնները:
Երկու նախագահները` տիկնանց եւ հիմնադրամի ղեկավարներուն հետ շրջայց կատարեցին կեդրոնի տարածքով, որ իր դռները պիտի բանայ շէնքի ամբողջական վերակառուցումէն ետք:
Այնուհետեւ նախագահներ Սարգսեան եւ Մաքրոն հանդէս եկան ելոյթներով: Նախագահ Սարգսեան նշեց, որ Ազնաւուրը 100 տոկոսով ֆրանսացի էր, 100 տոկոսով՝ հայ, եւ 100 տոկոսով աշխարհինն էր` աշխարհի քաղաքացի:
«Սիրելի նիքոլա, իմ, տիկնոջս, ընտանիքիս եւ ողջ հայ ժողովուրդի անունէն կրկին խորին ցաւակցութիւն կը յայտնեմ այս մեծ կորուստին համար: Քու հայրդ` մեծ բանաստեղծը, ժամանակին փիլիսոփայօրէն ըսած է, որ կէանքը շատ պարզ է` կայ ծնունդ, եւ կայ մահ, ու ատոնց միջեւ կէանքն է: Սակայն թոյլ տուէք ըսել, որ Ազնաւուրի նման մեծ բանաստեղծի, երաժիշտի, արուեստագէտի պարագային կայ մէկ բան, որ վեր է այդ ամենէն` երկրորդ կեանք մահէն ետք: Անոր երկրորդ կեանքը սկսաւ քանի մը օր առաջ», ընդգծեց Սարգսեան:
ՀՀ նախագահը շնորհակալութիւն յայտնեց էմանուէլ Մաքրոնին այն ամէն ինչի համար, որ ըրած էին ինքն ու իր կինը` Պրիճիթը, ու Ֆրանսայի ժողովուրդը` ցոյց տալով Ազնաւուրի հանդէպ մեծ սէրն ու գնահատանքը:
«Մենք այսօր պատմական պահ կ՛ապրինք` նայելով ապագայի «Ազնաւուր» կեդրոնին, Նիքոլայի ապագայ տանը, ֆրանսայի ապագայ տանը: Վստահ եմ, որ այս տունը պիտի դառնայ հիանալի կեդրոն` Հայաստանի մէջ ու անոր սահմաններէն դուրս ֆրանսերէն խօսքը, ֆրանսական մշակոյթը տարածելու համար», ըսաւ ՀՀ նախագահը:
Սարգսեան Մաքրոնին առաջարկեց մէկտեղել ջանքերը եւ Ֆրանսայի ու Հայաստանի մէջ բարեգործական համերգներ կազմակերպել` ի յիշատակ Ազնաւուրի, իսկ հանգանակուած գումարը ծառայեցնել «Ազնաւուր» հիմնադրամի նպատակներուն:
«Ազնաւուր» հիմնադրամի գործադիր տնօրէն Քրիսթինա Սարգսեան յայտնուեց, որ հիմնադրամի միջոցով Ազնաւուրը կը ցանկար Ֆրանսայի եւ Հայաստանի միջեւ կառուցել նոր կամուրջ:
«Մենք պիտի շարունակենք այս առաքելութիւնը աւելի մեծ ջանքերով ու նուիրումով», ընդգծեց Քրիստինա Սարգսեան:
Նիքոլա Ազնաւուր իր հերթին նշեց, որ իր եւ հիմնադրամի ողջ անձնակազմին համար ցաւալի է ներկայացնել «Ազնաւուր» կեդրոնի ծրագիրը` առանց հօր ներկայութեան:
«Ազնաւուր» կեդրոնի ճարտարապետը Արիս Ադամեանն է, որ դեռ Ազնաւուրի կենդանութեան օրօք անոր հետ քննարկած է կեդրոնի ամբողջական վերակառուցման նախագիծը:
Լուսանկարները` ՀՀ նախագահի աշխատակազմի հասարակայնութեան հետ կապերու վարչութենէն։
yerakouyn.com/2018/10/12/
