01 ՆՈՅԵՄԲԵՐ 2018 – ՀԱՅԱՍՏԱՆ – ՆԵՐՔԻՆ – ՔԱՂԱՔԱԿԱՆՈՒԹԻՒՆ:
Հայաստանի Հանրապետութեան Ազգային ժողովը առաջին ընթերցումով ընդունեց քրէական գործերով համաներում յայտարարելու մասին օրէնքի նախագիծը:
«Արմէնփրես»-ի հաղորդումով` նախագիծը ընդունուեցաւ Ազգային ժողովի 31 հոկտեմբերի արտահերթ նիստին ընթացքին:
Նախագիծին կողմ քուէարկեց 72 պատգամաւոր, դէմ եւ ձեռնպահ չկար:
Օրէնքի նախագիծի երկրորդ ընթերցումն ու քուէարկութիւնը տեղի պիտի ունենան այսօր:
Համաներում յայտարարելու մասին առաջարկուած նախագիծը ամէնէն շատ շահառու ունեցող համաներումն է: Ատով համաներում պիտի շնորհուի շուրջ 660 դատապարտեալի, Ազգային ժողովի նիստին ընթացքին ըսաւ Հայաստանի արդարադատութեան նախարարի պաշտօնակատար Արտակ Զէյնալեան:
Կառավարութիւնը նպատակ ունի համաներում յայտարարել Էրեբունի-Երեւանի հիմնադրման 2800-ամեակին եւ Հայաստանի առաջին Հանրապետութեան անկախութեան հռչակման 100-ամեակին առիթներով:
aztagdaily.com/archives/414731
