Ազրպէյճան Մերժած Է Կատարել Եւրոպական Խորհուրդին Պահանջները
12 ՓԵՏՐՈՒԱՐ 2020 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
Ազրպէյճանի նախագահ Իլհամ Ալիեւ յայտարարած է, որ Պաքուն մերժած է կատարել Եւրոպական խորհուրդի պահանջները: Այս մասին կը հաղորդէ «Ինթերֆաքս-Ազրպէյճան» լրատու գործակալութիւնը:
Ալիեւի խօսքով` որոշ միջազգային կազմակերպութիւններ կանխակալութեամբ կը գնահատեն Ազրպէյճանի մէջ արտակարգ խորհրդարանական ընտրութիւններուն ընթացքը, եւ «երբեմն բացասական եզրակացութիւնները կը պատրաստուին քուէարկութենէն առաջ»:
Անոր համաձայն, Եւրոպական խորհուրդին կողմէ այդպիսի վերաբերմունքի վերջին դրսեւորումը եղաւ «Ազրպէյճանի մէջ քաղաքական բանտարկեալներուն առնչուող տեղեկատուութեան մասին գործի» բանաձեւը:
Ալիեւ այդ փաստաթուղթի որդեգրումը որակած է կոպտագոյն միջամտութիւն` ընտրութիւններուն: «Մենք կը մերժենք մեզի դէմ առաջադրուած բոլոր մեղադրանքները եւ պիտի չկատարենք այսպէս կոչուած պահանջները, որոնք դրուած են մեր առջեւ», ընդգծած է Ազրպէյճանի նախագահը:
Եւրոպական խորհուրդի խորհրդարանական վեհաժողովի յունուարեան բանաձեւը Պաքուէն պահանջած էր «յուսալիօրէն եւ ամբողջ ծաւալով» լուծել քաղաքական բանտարկեալներու խնդիրները:
Ալիեւ յայտարարած է, որ Ազրպէյճանի համար այդ փաստաթուղթը ընդամէնը թուղթի կտոր է:
«Թուրան» լրատու գործակալութիւնը հաղորդեց, որ Ազրպէյճանի մէջ Միացեալ Նահանգներու դեսպանատունը հրապարակած է յայտարարութիւն մը` յայտնելով, որ կը կիսէ ԵԱՀԿ-ի Ժողովրդավարական հաստատութիւններու եւ մարդու իրաւունքներու գրասենեակին մտահոգութիւնները` Ազրպէյճանի խորհրդարանական ընտրութիւններուն վերաբերեալ, որոնք անցած են սահմանափակ օրէնսդրական եւ քաղաքական միջավայրի մէջ, ինչ որ խանգարած է իրական մրցակցութիւնը:
«Այս ընտրութիւնները տեղի ունեցած են մամուլի եւ հաւաքներու ազատութեան սահմանափակումներով», ըսուած է դեսպանատան յայտարարութեան մէջ:
Յայտարարութեան մէջ կ՛ըսուի նաեւ, որ Ազրպէյճան խոստացած է որքան կարելի է շուտ ուսումնասիրել ընտրական հոլովոյթին մէջ արձանագրուած խախտումները:
www.aztagdaily.com/archives/464479
