Սուրիոյ Քիւրտերը Թուրքիայէն Կը Պահանջեն Վերցնել Օճալանի Տեսակցութեան Արգելքը
14 ԱՊՐԻԼ 2020 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:– ԿԵԱՎՈՒՐ-երը ԵՒ ՄԵՆՔ:
Սուրիոյ քիւրտերու ձախ քաղաքական թեւը հանդիսացող Ժողովրդավարական միութիւն կուսակցութեան գլխաւոր խորհուրդը պահանջած է Թուրքիայէն` վերցնել քիւրտերու ղեկավար Ապտուլլահ Օճալանի հետ տեսակցութեան արգելքը: Այս մասին կը հաղորդէ թրքական «Ահվալ» կայքը:
Թուրքիան մնայուն կերպով արգելք կը ստեղծէ Օճալանի եւ փաստաբաններուն ու ընտանիքի անդամներուն տեսակցութեան համար:
«Մինչ ամբողջ աշխարհ «Քորոնա» ժահրի ստեղծած բացասական երեւոյթներու պատճառով լարուած վիճակի մէջ է, թրքական պետութիւնը նոյնիսկ այս պայմաններու տակ կը շարունակէ քիւրտ ժողովուրդին հանդէպ թշնամութիւնը` թէ՛ երկրին մէջ, թէ՛ երկրէն դուրս: Թուրքիան, Սուրիոյ քիւրտերու հանդէպ տածած թշնամութեան պատճառով, կը շարունակէ աւազակախումբերու աջակցիլ:
«Թրքական պետութիւնը կը շարունակէ քաղաքական գործիչներու եւ լրագրողներու հանդէպ ճնշումները: Բանտերուն մէջ պահուող մարդոց վերաբերեալ ոչ մէկ յայտարարութիւն տարածող թրքական պետութիւնը կ’արգիլէ կալանաւորներու եւ ընտանիքի անդամներու հանդիպումները: «Քորոնա» ժահրի արագ տարածման ընթացքին այս անմարդկային քայլերը կը բարկացնեն քիւրտ ժողովուրդը», նշուած է յայտարարութեան մէջ:
www.aztagdaily.com/archives/470755
