Այդ ամէնը կապ չունի Հայաստանի վարչապետի Փարիզ այցելութեան հետ – Ասիկա դիրքորոշում է, որ Մաքրոնը միշտ ունեցած է – Մուրատ Փափազեան
04 ՅՈՒՆԻՍ 2021 – ԿԻԶԱԿԷՏ – ՀԱՅՈՑ ՑԵՂԱՍՊԱՆՈՒԹԻՒՆ – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ – Կարդալ նաեւ՝:
«Լրագիր»-ի լրագրող Սիրանուշ Պապեան հարցազրոյց մը ունեցած է ՀՅԴ Բիւրոյի անդամ, Ֆրանսայի հայկական կազմակերպութիւններու համակարգող խորհուրդի համանախագահ Մուրատ Փափազեանի հետ, որ ի միջի այլոց խօսած է Հայաստանի վարչապետի պաշտօնակատար Նիկոլ Փաշինեանի Ֆրանսա կատարած այցելութեան մասին:
Փափազեան ըսած է, որ յստակ է, թէ Մաքրոնը հայամէտ քաղաքականութիւն կը վարէ, աւելցնելով. «Մենք Ֆրանսայի մէջ արդէն քանի մը տասնեակ տարի քաղաքական մթնոլորտ կը ստեղծենք, հայերուն հանդէպ համակրանք կը ստեղծենք: Մենք` իբրեւ Ֆրանսայի քաղաքացիներ, կը պաշտպանենք մեր դատը, Հայաստանը, Արցախը: Մենք աշխատած ենք բոլոր կառավարութիւններուն, բոլոր նախագահներուն հետ: Այսինքն` պատահական չէ, որ այսօր Ֆրանսայի նախագահը համակրանք ունի հայութեան եւ Հայաստանի նկատմամբ», ըսած է Փափազեան` շեշտելով, որ ասիկա Նիկոլ Փաշինեանի գործօնով չէ պայմանաւորուած:
Մուրատ Փափազեան անդրադառնալով Նիկոլ Փաշինեանի Ֆրանսա այցելութեան ըսաւ. «Երբ Նիկոլ Փաշինեան քանի մը շաբաթ առաջ ժամադրութիւն խնդրեց Ֆրանսայի նախագահէն, Մաքրոնը` գիտակցելով, որ Հայաստանը նախընտրական գործընթացի մէջ է, առաջարկեց, որ այդ հանդիպումը տեղի ունենայ հոկտեմբերին, որպէսզի այդպիսով Ֆրանսան չմիջամտէ ներքին քաղաքականութեան մէջ: Փաշինեան շատ պնդեց, որ այս հանդիպումը տեղի ունենայ արագ, ինչ որ ցոյց տուաւ, որ Փաշինեանին շահը չի համապատասխաներ Հայաստանի շահին»:
Իսկ անդրադառնալով Ֆրանսայի նախագահի յայտարարութիւններուն` Մուրատ Փափազեան ըսաւ, որ Մաքրոն դեռ պատերազմի ընթացքին իր յստակ դիրքորոշումները յայտնած է, հանդէս եկած է յայտարարութիւններով, աւելցնելով. «Նախագահ Մաքրոն քանի մը անգամ ընդունած է մեզի եւ յստակօրէն շեշտած է Ֆրանսայի աջակցութիւնը Հայաստանի ու Արցախի հայութեան: Մաքրոն քանի մը անգամ մեզի ըսած է, որ ինք համաձայն չէ եռակողմանի յայտարարութեան բոլոր կէտերուն, յատկապէս Հատրութին ու Շուշիին վերաբերող, յատկապէս Սիւնիքի միջանցքի ծրագիրին, որ համաթուրանական ճամբայ է: Այդ ամէնը կապ չունի Հայաստանի վարչապետի Փարիզ այցելութեան հետ: Ասիկա դիրքորոշում է, որ Մաքրոնը միշտ ունեցած է»:
www.aztagdaily.com/archives/510928
