Արդէն Զզուած Ենք՝ Սպասելով, Թէ Ամէն Ապրիլ 24-ի ԱՄՆ-ն Հայերուն Վերաբերեալ Ինչ Պիտի Ըսէ. Էրտողան
03 ՅՈՒՆԻՍ 2021 – ԿԻԶԱԿԷՏ – ՀԱՅՈՑ ՑԵՂԱՍՊԱՆՈՒԹԻՒՆ – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ – Կարդալ նաեւ՝:
Թուրքիոյ նախագահ Ռեճեփ Թայիփ Էրտողանը հարցազրոյց տուած է պետական «TRT» հեռուստաընկերութեան: Ըստ Ermenihaber.am-ի՝ ան անդրադարձած է ԱՄՆ նախագահ Ճօ Պայտընի հետ Յունիս 14-ին կայանալիք հանդիպման եւ արցախեան հիմնախնդրին: Նշած է, որ Պայտընի հետ հանդիպման ընթացքին պիտի հարցնէ թուրք-ամերիկեան յարաբերութիւններու լարուածութեան պատճառը:
Ըստ Էրտողանի՝ Պայտընէն առաջ իրենք աշխատած են թէ՛ դեմոկրատական եւ թէ՛ հանրապետական կուսակցութիւնները ներկայացնող նախագահներու հետ, որոնցմէ ոչ մէկուն օրով 2 երկիրներուն միջեւ նման լարուածութիւն չէ եղած: Պայտընի նախորդողներուն օրով դժուարութիւններ չեն եղած նաեւ հանդիպումներու եւ հեռախօսազրոյցներու կազմակերպման հարցով:
Նշելով, որ երկու երկիրներու լարուածութեան խորացման պատճառը Հայոց Ցեղասպանութեան հարցն է՝ Էրտողան շեշտած է. «Արդէն զզուած ենք՝ սպասելով, թէ ամէն տարի Ապրիլ 24-ին ԱՄՆ-ն հայերուն վերաբերեալ ինչ պիտի ըսէ: Լաւ, բան ու գործդ վերջացուցած ես ու հայերու փաստաբանութի՞ւնը պիտի ընես: Ձգենք այդ գործը պատմաբանները ընեն: Ասիկա քաղաքական գործիչներու գործը չէ, թող պատմաբանները, իրաւագէտները, մարդաբանները աշխատին, որմէ ետք մեր առջեւ դրուած արդիւնքին վերաբերեալ մենք ալ, իբրեւ քաղաքական գործիչներ, ընենք մեզի վիճակուածը: Սակայն այս պահուն, երբ որեւէ բան դեռ չկայ, կը բռնէք ու հարցը օրակարգ կը բերէք»:
Թուրքիոյ նախագահը, այնուհետեւ անդրադառնալով արցախեան հիմնախնդրին, ըրած է հետեւեալ պնդումները. «Տարիներ շարունակ Մինսկի եռեակը՝ ԱՄՆ-ն, Ռուսիան եւ Ֆրանսան, Հայաստան-Ազրպէյճան խնդիրը չկրցան լուծել: Տարիներ անց, ի վերջոյ, Ազրպէյճանը ինքն իր խնդիրը լուծեց (բառացի՝ ինքն իր պորտը կտրեց): Հիմա այստեղ ընդհանրապէս որեւէ կապ չունեցող Թուրքիան ինչպէ՞ս այդ հարցին մէջ կը դնէք: Եթէ որեւէ բան ունիք ըսելու, որեւէ բան կայ, որ կ՝ուզէք ընել, եկէք, իբրեւ ՆԱԹՕ-ի մէջ ձեր դաշնակից ու գործընկեր, ըսէք՝ այսինչ բանը կ՝ուզենք ընել, այնինչ բանը կ՝ուզենք ընել եւ մենք ալ կը խօսինք: Բայց նման բան չկայ: Մէկ անգամէն կ՝ելես եւ մեր առջեւ կը դնես այսպէս կոչուած ցեղասպանութեան հարցը եւ ուզածդ որոշումը կ՝ընդունիս: Քեզի նախորդած ԱՄՆ ղեկավարները, ի՞նչ է, քեզի չափ չէի՞ն հասկնար այս գործէն: Անոնցմէ ոչ մէկը այդ արտայայտութիւնը չէ ըրած, մէկ մասը «Մեծ եղեռն» ըսած է, մէկ մասն ալ՝ շատ այլ տարբեր բաներ, բայց ոչ երբեք այդ եզրոյթը»:
Լրագրողի ճշտող հարցին, թէ արդեօք «ցեղասպանութիւն» եզրոյթի կիրառումը կը բխի այլ պատճառներէ, Էրտողանը պատասխանած է.
«Մենք այդ ամենուն արդէն վարժուած ենք, միշտ նման բաներ կ՝ընեն: Թուրքիան գաճաճ պետութիւն չէ, մենք Թուրքիոյ Հանրապետութիւն ենք: Անոնք, որոնք Թուրքիան այս կերպ նեղը կը դնեն, կը կորսնցնեն կարեւոր բարեկամ»:
yerakouyn.com/2021/06/02/արդէն-զզուած-ենք՝-սպասելով-թէ-ամէն-ապր/
