Ազրպէյճանական Զինուժի Անպատիժ Խափանարարութիւնը ՀՀ Մայրուղիներուն Վրայ… Եւ Մեր Ժողովուրդի Համբերութեան Բաժակը – ԿԱՐՕ ԱՐՄԵՆԵԱՆ
29 ՅՈՒԼԻՍ 2021 – ԵՐԿԻՐ ՀԱՅԱՍՏԱՆ – ՊԱՏՄԱԿԱՆ ԷՋԷՐ: Կարդալ նաեւ՝ ՆԱԽՈՐԴ ՅՕԴՈՒԱԾԸ:
ԿԱՐՕ ԱՐՄԵՆԵԱՆ
Օգոստոսի 25-ին ազրպէյճանական բանակի միաւորներ փակեցին Կապան-Գորիս ճանապարհը Կարմրաքար-Շուռնուխ հատուածի մօտակայքը: Օգոստոսի 26-ին երթեւեկի խափանման այս կամայական ռեժիմը տարածուեցաւ նոյն ճանապարհի Գորիս-Որոտան մատոյցներուն վրայ: Օգոստոսի 27-ին, ընթացք տալով Մոսկուայի ճնշումներուն, ազրպէյճանական զինուժի հրամանատարութիւնը յօժարեցաւ վերցնել երթեւեկի արգելքը եւ առիթ տալ, որ մեքենաներու եւ մարդոց շրջանառութիւնը վերահաստատուի, բայց…
Բայց յանկարծ պեթոնէ անցարգելներ յայտնուեցան Սիւնեաց մայրուղիի զանազան կէտերուն վրայ` արհեստականօրէն դանդաղեցնելով ճանապարհի բնականոն շրջագայութիւնը:
Իսկ այսօր արդէն Պաքու կը նախաձեռնէ ճանապարհի այս հատուածին վրայ մնայուն ստուգակէտեր (checkpoint) հաստատելու գործին:
Կը խօսինք հայ պետականութեան լինելիութիւնը կարելի դարձնող մեր երկրի երկու կենսական ճանապարհներէն մէկուն մասին: Ասիկա այն ճանապարհն է, որով Հայաստանի տնտեսութիւնը կը յաջողի ապահովել իր ցամաքային հաղորդակցութիւնը Իրանի հետ եւ ճամբայ հարթել մինչեւ Պարսից կամ Արաբական ծովածոցի շուկայական մեծ հարթակները: Ասիկա այն ճանապարհն է, որմով կը պարենաւորուի Արցախի տնտեսութիւնը: Ասիկա այն ճանապարհն է, որ կոչուած է ապահովելու Հայաստանի ռազմական վերահսկողութիւնը Հայաստանի հարաւային ռազմաբեմին վրայ: Ասիկա Սիւնիքի եւ Վայոց Ձորի պաշտպանութեան խարիսխն է: Ասիկա զօր. Անդրանիկի, սպարապետ Նժդեհի, զօր. Դրոյի սխրագործութիւնները կարելի դարձնող պատմական անցուղին է դէպի Մեղրի եւ դէպի Գողթն: Ասիկա ճանապարհ չէ: Ասիկա մայր երակ է մեր ժողովուրդին համար: Եւ այս մայր երակն է, որ նոյեմբեր 9-ի ձախաւեր համաձայնութեամբ Փաշինեան յանձնած է Ազրպէյճանի: Եւ այսօր սահմռկեցուցիչ համարձակութեամբ ան կը յայտարարէ, որ ճանապարհի այս կենսական հատուածը մեզի չի պատկանիր, եւ թէ` Ազրպէյճան ի՛նչ որ կ՛ուզէ, կարող է ընել իրեն «պատկանող» այդ տարածքներուն վրայ…
Խօսիլ այս բոլորին մասին` արդէն դարձած է բացարձակապէս անհեթեթ: Ան դարձած է տառապալից ու վիրաւորական: Ամէն մարդ գիտէ, թէ ի՛նչ կը կատարուի Սիւնիքի ռազմավարական գօտիին շուրջ: Ամէն մարդ տեղեակ է, թէ ի՛նչ դիտաւորութիւններով կը գործեն Հարաւային Կովկասի այս մասին մէջ` Թուրքիան, Ազրպէյճանը, Մոսկուան, Իրանը, Իսրայէլը, Եւրոպան, Միացեալ Նահանգները: Ամէն մարդ գիտէ, թէ ի՛նչ վարքագիծով կը գործեն Փաշինեանն ու իր վարչակազմը այս խնդիրներու ոլորտին մէջ: Մինչեւ հոս նորութիւն չկայ:
Զարմանալին, եւ ընդվզեցուցի՛չը, ազրպէյճանական բանակի համարձակութիւնն է Հայաստանի սահմանագիծերուն վրայ: Այն իրողութի՛ւնը, որ այս մարդիկ քանի մը հարիւր զինուորներով ամբարտաւանօրէն կը մտնեն մեր սահմաններէն ներս իրենց տխմար GPS սարքերով եւ առօք-փառօք դուրս կը հրեն սիւնեցիներն ու գեղարքունեցիները իրենց տուներէն: Անոնք կը խլեն մեր ռազմավարական դիրքերը մեր աչքերուն առջեւ: Անոնք ահռելի պնդերեսութեամբ կը պահանջեն Տիգրանաշէնը: Անոնք գերիներ կը վերցնեն: Մարդիկ կը սպաննեն: Կը ժպրհին հրապարակաւ անարգել հայոց բանակը, հայ ժողովուրդը: Հայաստանը կը հռչակեն իրենց տիրոյթը… Եւ զարմանալին այն է, որ անոնք չեն հանդիպիր նուազագոյն ընդդիմութեան: Անոնք վստահ են, որ պիտի չգտնուի թէկուզ մէկ խենթ, որ օր-ցերեկով շանսատակ ընէ քանի մը ազերի զինուոր իրենց լկտի պահուածքին համար: Պիտի չգտնուի ըմբոստութեան մէկ ազազուն նշոյլ, որ օդը հանէ ազրպէյճանական բանակի մէկ ամբողջ միաւոր: Քոշմարային է մտածել այս բոլորին մասին: Այս բաները իրօ՞ք տեղի կ՛ունենան: Իրօ՞ք ականատեսն ենք այս գերիրական քաոսին: Իրօ՞ք մենք այս ենք եւ «գործք արութեան ո՞չ գտանին գործեալ ի մերում աշխարհիս»… Սո՞ւտ էր Պատմահայրը:
Դուք չէ՞ք զարմացած: Ես զարմացած եմ: Ես չեմ տեսած որեւէ գրաւման բանակ, որ այսքան ապահով զգայ ինքզինք իր կայքէն այսքան հեռու եւ թշնամի հողի վրայ: Արդեօ՞ք հասած ենք հոն, ուր մեր թշնամին արդէն համոզուած է, որ մեր երկիրը թշնամի հող չէ այլեւս իրեն համար: Եթէ հասած ենք այդ կէտին, պէտք է հարց տանք, թէ ո՞վ է, որ իսկապէս կը ներշնչէ իրեն այդ թիւր ինքնավստահութիւնը: Մոսկուա՞ն: Արեւմո՞ւտքը: Իսրայէ՞լը: Մեր համեմատական սպառազինութեանց անհաւասարութի՞ւնը: Արդեօ՞ք թշնամին կը կարծէ, թէ մեռած է մեր ժողովուրդը: Արդեօ՞ք իր եւ իր խորհրդատուներուն բթամտութիւնը հասած է այնպիսի աստիճանի մը, ուր անոնք մոռցած են մեր պատմութիւնը: Կամ արդեօք մե՞ր բթամտութիւնը հասած է այն աստիճանին, ուր ՄԵՆՔ` ԻՆՔՆԵ՛ՐՍ մոռցած ենք մեր պատմութիւնը:
Երբ որեւէ կառավարութիւն որեւէ երկրի մէջ կը դադրի իր ժողովուրդին եւ իր երկրի հողային ամբողջականութեան եւ իր ազգային գերագոյն շահերուն յաջողապէս տիրութիւն ընելէ, ան պէտք է ընդփոյթ դուրս դրուի իշխանութենէ: Ժողովուրդին արթուն խիղճը պէտք է քաղաքականօրէն յօշոտէ նման իշխանութիւնը: Երբ որեւէ պատճառով ինքնամաքրման այդ արարքը տեղի չ՛ունենար, պարզ է, որ ժողովուրդին արթուն խիղճը ներկայացնող ուժերը իրե՛նք իրենց ձեռքերուն մէջ առնեն ազգին ճակատագիրը:
Երբ նացիական Գերմանիոյ գրաւումով Ֆրանսայի մէջ հաստատուեցաւ մարաջախտ Փեթենի վիշիական կառավարութիւնը, ֆրանսացի ժողովուրդը տեղի չտուաւ պարտութեան իշխանութիւններու սադրանքին առջեւ: Նացիական ուժերը երբեք հանգիստ օր չունեցան Ֆրանսայի մէջ: Այդ պայքարին իրենց փայլուն մասնակցութիւնը բերին նաեւ մեր հայրենակիցները բանաստեղծ Միսաք Մանուշեանի առաջնորդութեամբ եւ առանց կուսակցական խտրութեան: Այսօր Վիշիի խրտուիլակները մոռցուած են վաղուց եւ Ֆրանսայի պատմութեան անիւը համարձակօրէն դարձնող Դիմադրական շարժման հերոսներն են միայն, որ կը յիշուին, քանի որ անոնք են միայն, որ հաստատած են ազգային արժանապատուութեան չափանիշը ապագայ բոլոր սերունդներուն համար:
Յիշեցի այս օրինակը` ըսելու համար, որ մենք իրաւունք չունինք այսօր աւելի ցածր նշաձողով վերաբերելու մեր ժողովուրդին հետ: Չունինք նաեւ պատճառ: Այսինքն ունինք ամէն պատճառ թշնամիին օրերը համրուած համարելու: Թշնամին պիտի գիտնայ, որ ինք կը գտնուի թշնամի հողի վրայ (հակառակ Նիկոլ Փաշինեանի ճամարտակութիւններուն) եւ իր թրքական պայրաքտարներն ու իսրայէլեան անօդաչու թռչող սարքերը եւ ռուսական ռազմանիւթի պաշարները չեն օգնելու իրեն:
Հայաստանի սահմանները նոյեմբեր 9-ի եւ յունուար 11-ի փաստաթուղթերը ստորագրողները չեն, որ պիտի հաստատեն: Հայաստանի սահմանները հայ ժողովուրդն է, որ պիտի գծէ: Այս օրէնքը այլընտրանք չունի: Հայոց երկրի անվտանգութիւնը հայ ժողովուրդն է, որ պիտի ապահովէ` սանձելով թշնամին եւ պատուհասելով իր կենսական շահերը տարածաշրջանին մէջ: Այո՛, պատերազմը վերջ չէ գտած: Թշնամին պիտի գիտնայ, որ պատանդի կարգավիճակը վայելողը այժմ իր բանակի միաւորներն են հայոց հայրենիքի հողին վրայ: Կասկած մի՛ ունենաք, որ Հայաստանի բազմաչարչար հողը նաեւ պիտի ըլլայ բոլոր թշնամի ուժերու երկարաձիգ գողգոթան:
11 սեպտեմբեր 2021
www.aztagdaily.com/archives/522464
