Իշխան Սաղաթէլեան – «Մուրատ Փափազեանի Մուտքը Արգիլելու Իրական Պատճառները 3 Են»
26 ՅՈՒԼԻՍ 2022 – ԴԻՄԱԴՐՈՒԹԻՒՆ:
– Արտերկրի Անկախ Հայեր – Հայաստանի եւ Թուրքիոյ ներկայացուցիչներու բանակցութիւններու մասին
«Մուրատ Փափազեանի մուտքը արգիլելու իրական պատճառները 3 են», այս մասին «Երեւան.ԹուՏէյ»-ի հետ զրոյցի մը ընթացքին ըսաւ ՀՅԴ Հայաստանի Գերագոյն մարմինի ներկայացուցիչ Իշխան Սաղաթէլեան` անդրադառնալով ՀՅԴ Բիւրոյի անդամ, Ֆրանսայի հայկական կազմակերպութիւններու համակարգող խորհուրդի համանախագահ Մուրատ Փափազեանի մուտքը Հայաստանի տարածք արգիլելու փաստին:
Նշելով պատճառները` Իշխան Սաղաթէլեան ըսաւ.
«Առաջինը` Նիկոլը իր այդ քայլով կը փորձէ հաճոյանալ թուրքերուն` ցոյց տալով, որ տեսէք ինչպէս կը հարուածեմ Հայ դատի պաշտպանները. ասիկա յստակ ուղերձ էր թուրքերուն` զանոնք սիրաշահելու, անոնց հաճոյանալու առումով, ինչպէս նաեւ ան այդպիսով Հայաստան-սփիւռք` իր իշխանութեան օրով սկիզբ առած պառակտումը կը խորացնէ, որովհետեւ ատիկա եւս թուրքերուն հաճոյանալու կարեւոր քայլ է իրեն համար:
Երկրորդ պատճառը այն է, որ այդ քայլով կ՛ուզեն վախցնել միւս սփիւռքահայ գործիչները եւ ցոյց տալ, որ բոլոր անոնք, որոնք սփիւռքի մէջ դիմադրութիւն կը ձեւաւորեն Թուրքիոյ կառավարութեան դէմ, ինչպէս նաեւ այս իշխանութիւններուն կը յիշեցնեն իրենց դաւաճանութեան մասին ու կը պայքարին այս դաւաճան կառավարութեան դէմ, անցանկալի անձ կրնան նկատուիլ Հայաստանի մէջ: Եւ երրորդը` այդպիսով ան դրսեւորեց իր հերթական հակադաշնակցական քայլը եւ գործողութիւնը: Ի դէպ, Նիկոլի պայքարը Դաշնակցութեան դէմ կու գայ իր թրքասիրութենէն: Մեր դէմ այսպէս ջանասիրաբար տարիներ շարունակ պայքարած են թուրքերն ու ազրպէյճանցիները, ուստի` դաշնակցական գործիչներու դէմ պայքարելու իր այս մոլուցքին պատճառը զուտ թրքասիրութիւնն է, եւ այս առումով ասոնք բոլորը իրար գաղափարակից են»:
Ըստ Սաղաթէլեանի, վերոնշուածներն են Մուրատ Փափազեանը հայրենիքի մէջ անցանկալի անձ ճանչնալու հիմնական պատճառները, իսկ մնացածը անկարեւոր խօսքեր, որոնցմով Փաշինեանի իշխանութիւնը կը փորձէ արդարացնել իր ապօրինի, հակասահմանադրական եւ հերթական ճղճիմ գործողութիւնը:
«Մէկ տարի առաջ Ֆրանսայի մէջ ցոյց տեղի ունեցած է, եւ դեռ պարզ չէ` Մուրատ Փափազեանը այդ ցոյցին մասնակցա՞ծ է, թէ՛ ոչ: Մէկ տարուան ընթացքին քանի մը անգամ ան եկած է Հայաստան, եւրոպացի կարեւոր պաշտօնեաներու ուղեկցած. որեւէ բան տեղի չէ ունեցած, եւ յանկարծ` Փափազեանին կ՛արգիլեն սփիւռքի մէջ «Դիմադրութիւն» շարժման պայքարի աշխուժացման փուլին մէջ: Բնականաբար, այս համընկնումը պատահական չի կրնար ըլլալ: Հետեւաբար` իշխանութեան բացատրութիւնները ծիծաղաշարժ պիտի թուէին, եթէ խորքին մէջ ողբերգական չըլլային, իսկ իրական պատճառները վերը նշեցի», եզրափակեց Իշխան Սաղաթէլեան:
aztagdaily.com/archives/553287
